Toqaev qazanda Qazaqstan halqyna Joldaýyn jarııalaıdy
ASTANA. KAZINFORM – Memleket basshysy Qasym-Jomart Toqaev VI Dúnıejúzilik kóshpendiler oıyndary jeńimpazdaryn marapattaý rásiminde qazan aıynda Qazaqstan halqyna Joldaý jasap, aldaǵy josparlardy aıqyndaıtynyn aıtty.
- Qazir elimiz tarıhı órleý dáýirine qadam basty. Biz birtutas el bolyp, asa aýqymdy reformalardy tabysty júzege asyrdyq. Barsha jurtymyzǵa, ásirese, óskeleń urpaqqa baǵdar beretin Konstıtýtsııamyzdy qabyldadyq. Ádiletti, kúshti, ozyq, taza Qazaqstannyń berik negizin qaladyq. Muny ult tarıhyndaǵy naǵyz betburysty oqıǵa dep baǵalaýǵa bolady. Konstıtýtsııa – halqymyzdyń temirqazyǵy, el ishindegi túbegeıli ózgeristerge tyń serpin bergen qasterli qujat, - dedi Qasym-Jomart Toqaev.
Prezıdent taıaýda ǵana Quryltaı saılaýy ótkenin, joǵary zań shyǵarýshy organǵa kásibı, isker, jańashyl azamattar kirgenin, olardyń ishinde jastar da az emes ekenin atap ótti.
- Vıtse-Prezıdent taǵaıyndaldy. Jańartylǵan Úkimet jumysyna kiristi. Qaýipsizdik keńesiniń apparaty jasaqtaldy. Kóp uzamaı Qazaqstan halqy keńesiniń quramy bekitiledi. Quryltaıdyń kelisimimen Konstıtýtsııalyq sot sýdıalary, Ortalyq saılaý komıssııasy men Joǵary aýdıtorlyq palatanyń músheleri taǵaıyndalady. Osylaısha elimizdiń negizgi memlekettik ınstıtýttary tolyq jańǵyrtylady. Bul da aýqymdy reformalarymyzdyń óte mańyzdy bóligi. Al qazan aıynda men Konstıtýtsııanyń 46-babyna sáıkes Qazaqstan halqyna Joldaý jasap, aldaǵy josparymyzdy aıqyndaımyn, - dedi Memleket basshysy.
Aıta keteıik, Qazaqstan quramasy 31 tamyz ben 6 qyrkúıek aralyǵynda Qyrǵyzstanda ótken VI Dúnıejúzilik kóshpendiler oıyndarynda 74 medal jeńip aldy.
