Toqaev Qazaqstannyń UQShU-ǵa tóraǵalyq etýdegi basymdyqtaryn atap ótti
Kezdesýde Q.Toqaev bıyl Qazaqstannyń UQShU-ǵa tóraǵalyq etetinin eske saldy. Sonymen qatar, bizdiń bul basymdyqty ulttyq jáne ujymdyq qaýipsizdikke tónetin qaýip-qaterge qarsy shuǵyl áreket etetin tıimdi áskerı-saıası uıym retinde qarastyratynyn atap ótti.
Óz sózinde Senat basshysy, Qazaqstan Prezıdenti Nursultan Nazarbaev Mınski sammıtinde belgilegen 2018 jyly UQShU-ǵa Qazaqstan tóraǵalyq etý kezeńindegi mynadaı basymdylyqtar týraly aıtyp ótti: múshe memleketterdiń áskerı saladaǵy ózara is-qımyl quraldaryn keńeıtý, áskerı-tehnıkalyq yntymaqtastyqty praktıkalyq turǵydan uıymdastyrý, UQShU-nyń terrorızmge qarsy jahandyq qarsy áreket etýdiń halyqaralyq júıesin qalyptastyrýǵa qatysý, UQShU-ǵa múshe memleketterdiń kıberqaýipsizdikke qarsy birlesken ádisteri, esirtkiniń zańsyz aınalymyna qarsy is-qımyldardyń tıimdiligin arttyrý.
«Alǵashqy eki basymdyqqa keletin bolsaq, jedel áreket etetin qajetti qaýipsizdik qurylymdary quryldy, uıymnyń bitimgerlik áleýeti anyqtaldy. Jyl saıyn «Buzylmas baýyrlastyq», «Ózara is-qımyl», «Shep» áskerı oqý-jattyǵýlary ótýde», - dedi Q.Toqaev.
Ol sondaı-aq, Qazaqstannyń halyqaralyq terrorızm men zorlyq-zombylyqqa qarsy turý jónindegi josparlary týraly aıtty.
«Osyǵan baılanysty, Mınsk otyrysynda bizdiń memleketimizdiń basshysy terrorızmge qarsy turýdyń halyqaralyq arenadaǵy ortaq ádisterin birlesip daıyndaý týraly usynys kótergen bolatyn. Bul jerdegi másele UQShU-ǵa múshe memleketter azamattarynyń terrorıstik oshaqtarǵa ketýine jol bermeý, sondaı-aq, qoǵam sanasyndaǵa saıası jáne dinı radıkaldyq dúnıelerdiń kez kelgen formasyna qarsy aqparattyq-túsindirý jumystaryn júrgizý», - dedi Senat basshysy.
Kıberqaýipsizdik týraly Q.Toqaev UQShU-ǵa múshe memleketterdiń aqparattyq-kommýnıkatsııalyq ınfraqurylym nasandaryna baǵyttalǵan kompıýterlik shabýyldardy beıtaraptandyrý boıynsha sharalardy ázirleý qajettigin atap ótti. Sonymen birge zańsyz esirtki aınalymy týraly da aıtyldy.
«Qazaqstan 2015-2020 jyldarǵa arnalǵan UQShU-nyń esirtkige qarsy strategııasyn praktıkalyq túrde iske asyrýdy jáne bul máselege BUU Esirtki jáne qylmys jónindegi basqarmasymen qurylǵan Ortalyq Azııa aımaqtyq aqparattyq jáne úılestirý ortalyǵynyń ókilderin tartýdy usynady», - dedi Q.Toqaev.
