Toqaev Qazaqstannyń Ýkraınadaǵy jaǵdaıǵa qatysty ustanymyn túsindirdi
ASTANA. KAZINFORM — Berlınde Germanııa kantsleri Frıdrıh Mertspen kelissózder qorytyndysy boıynsha ótken baspasóz máslıhatynda Qazaqstan Prezıdenti Qasym-Jomart Toqaev Vladımır Pýtındi «kórnekti memleket qaıratkeri» dep sanaıtynyn aıtty, dep habarlaıdy Kazinform.
– Osy máselege qatysty jeke ustanymymdy túsinistikpen qabyldaǵany úshin Prezıdent Pýtınge rızashylyǵymdy bildiremin. Óıtkeni bárimiz, memleket basshylary, sonyń ishinde Reseı Prezıdenti de Ýkraına aýmaǵyndaǵy áskerı qımyldardy toqtatýdy qoldaımyz. Prezıdent Pýtınmen qarym-qatynasym óte jaqsy. Men ony kórnekti memleket qaıratkeri dep sanaımyn, – dedi Toqaev.
Sondaı-aq ol Pýtındi Ortalyq Azııa, sonyń ishinde Qazaqstan úshin, Eýropa jáne búkil álem úshin ońtaıly tulǵa dep sanaıtynyn aıtty.
– Men ony óte jaqsy bilemin. Onyń boıynan tarıhy qym-qıǵash alyp eldiń basshysyna tán qasıetterdiń bári tabylady. Árıne, bárimiz Ýkraınada bolyp jatqan jaǵdaıǵa alańdaımyz, – dedi Prezıdent ARD telearnasynyń suraǵyna jaýap bere otyryp.
Memleket basshysy Qazaqstannyń áýel bastan Birikken Ulttar Uıymy Jarǵysynyń erejelerin ustanyp kele jatqanyn atap ótti.
– Biz barlyq memlekettiń aýmaqtyq tutastyǵy qaǵıdatyn saqtaýǵa jáne qurmetteýge úndep kelemiz. Ýkraına halqyna, onyń tarıhyna, mádenıeti men dástúrine, tiline zor qurmetpen qaraıtynymyzdy burynnan aıtyp júrmiz. Men soǵysty dereý toqtatý týraly aıtpadym. Qazirgi jaǵdaıda munyń ońaı emes ekenin túsinemin. Meniń meńzegenim: Ýkraına aýmaǵyndaǵy áskerı is-qımyldy ýaqytsha doǵaryp, dıplomatııalyq protseske kóshý nemese qandaı da bir kelissóz bastaý edi, – dedi Qazaqstan Prezıdenti.
Ol Reseı de, Ýkraına da Qazaqstannyń jaqsy dostary ekenin atap ótti.
– Reseıge qatysty Qazaqstan men Reseı arasynda uzyndyǵy 7597 shaqyrym bolatyn ortaq shekara bar ekenin umytpaý kerek. Bul – álemdegi eń uzyn shekara. Bul osy elmen dostyq qarym-qatynasty damytýǵa áser etetin faktor emes pe? Qazaqstan aýmaǵynda elimizdiń 2,7 mıllıon reseılik etnos ókili turady. Elimizde pravoslav shirkeýi de bar, biz oǵan úlken qurmetpen qaraımyz. Sondyqtan osy jaıttardyń barlyǵyn eskerý qajet. Máselege birden kesip sheshim shyǵarýǵa bolmaıdy.
Qazaqstanǵa beıbitshilik pen turaqtylyq qajet. Onsyz biz eshqashan tabysty el bola almaımyz. Qazir biz damýymyzda eleýli jetistikterge jetip kelemiz. Kórsetkishter alǵa qaraı ilgerileý bar ekenin nanymdy kórsetip otyr. Sondyqtan Prezıdent retinde elimizde beıbitshilik pen turaqtylyqty qamtamasyz etý úshin qoldan kelgenniń bárin jasaımyn. Bul Qazaqstanmen kórshiles aýmaqta beıbitshilikke qol jetkizýge jáne soǵysty toqtatýǵa qoldan kelgenshe úles qosý úshin qajet, – dedi Memleket basshysy.
Aıta ketelik Qasym-Jomart Toqaev Germanııaǵa resmı saparmen bardy. Sonymen qatar Qasym-Jomart Toqaev pen Frank-Valter Shtaınmaıer Birlesken deklaratsııa qabyldady. Sondaı-aq Prezıdent Qasym-Jomart Toqaev Kantsler Frıdrıh Mertspen kelissóz júrgizdi.
