Toqaev Qazaqstannyń tranzıttik áleýetin synǵa aldy
ASTANA. KAZINFORM –Zamanaýı joldar men jol boıyndaǵy sapaly qyzmet kórsetý ınfraqurylymy bolmasa, Qazaqstan halyqaralyq tranzıt dálizi nemese Eýrazııadaǵy kólik-logıstıka ortalyǵy bola almaıdy. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
Prezıdent máseleniń mańyzy zor ekenin, ony qalaı bolǵanda da sheshý qajettigin basa aıtty.
– Eger shekara birneshe shaqyrymǵa sozylǵan kólik keptelisin týdyratyn «tar ótkelge» aınalsa, al qazirgi jaǵdaı osyndaı bolsa, onda Qazaqstannyń óńirdegi kóshbasshylyǵy týraly sóz qozǵaýdyń ózi artyq, – dep synǵa aldy Prezıdent.
Memleket basshysynyń aıtýynsha, Eýropa men Azııany jalǵaıtyn negizgi áýe dálizderi elimizdiń aýmaǵy arqyly ótedi. Bul – elimizge úlken básekelik artyqshylyq beretin múmkindik.
– Alaıda ázirge bul ádemi prezentatsııalarda qalyp otyr. Osy múmkindikti is júzinde paıdalaný úshin jerústi servıstik ınfraqurylymyn damytý qajet. Bul – álemdik tájirıbede qalyptasqan tásil. Al qazir qomaqty tabys kózderi elimizdi aınalyp ótýde, – dedi ol.
Toqaev «Air Cargo» jeke kompanııasyna úlken úmit artylǵanyn atap ótti.
– Onyń qarjylyq múmkindigi mol, sonyń ishinde sheteldiń jetekshi mamandarynyń eńbekaqysyn tóleýge de qaýqarly. Sondaı-aq kompanııa derbes sheshim qabyldaı alady. Biraq áli kúnge deıin naqty sheshim de, nátıje de joq. Sizderge senim arttyq. Endi naqty nátıje kútemiz, – dedi Prezıdent.
Aıta keteıik, bıylǵy Joldaý «Jańa tarıhı kezeńdegi Qazaqstannyń ózekti mindetteri» dep atalady.
Buǵan deıin Prezıdent Ulttyq qordyń eń basty mıssııasyn ataǵan edi.
