Toqaev Qazaqstannyń mıneraldy resýrstaryn ıgerýde Koreıamen jańa model usyndy
ASTANA. KAZINFORM — Qasym-Jomart Toqaev asa mańyzdy mıneraldar álemdik ekonomıkanyń strategııalyq turǵydan mańyzdy ári tez damyp kele jatqan sektory sanalatynyna nazar aýdardy. Bul týraly Aqorda málim etti.
— Qazaqstannyń jer qoınaýynda atalǵan strategııalyq resýrstardyń mol qory bar. Bul óndiristiń ozyq salalarynda jáne basqa da tabysy joǵary sektorlarda qazaq-koreı yntymaqtastyǵyn damytýǵa jol ashady. Qazaqstannyń qazba baılyqtaryn ıgerýge Koreıa tarapy ınvestıtsııa salyp qana qoımaı, tehnologııalyq tájirıbesimen bóliskenin de qýana quptaımyz. Bul rette qosylǵan quny bar tolyqqandy óndiris tizbegin birlesip damytý úshin «Resýrs — tehnologııa — ónerkásip» modelin usynamyz. Almaty qalasynda ashylatyn Sırek kezdesetin metaldar salasyndaǵy tehnologııalyq yntymaqtastyq ortalyǵy jańa úlgi aıasyndaǵy seriktestikti qalyptastyrýdyń qısyndy qadamy bolmaq. Ǵalymdardyń ortaq izdenisiniń nátıjesinde resýrstyq bazany zertteý jumystary naqty ónerkásip jobasyna ulasady dep senemiz, — dedi Memleket basshysy.
Prezıdent eki eldiń yntymaqtastyǵynda energetıka salasy da mańyzdy ekenin aıtty. Ol koreıalyq kompanııalar Qazaqstannyń energetıka sektoryna qyzyǵýshylyq tanytyp otyrǵanyn joǵary baǵalady.
— Hyundai Engineering qazirdiń ózinde Qarashyǵanaq gaz óńdeý zaýytynyń qurylysynda jetekshi ról atqarady. Atalǵan jobany koreıalyq kompanııalardyń bizdiń naryqta strategııalyq turǵydan uzaqmerzimdi turaqtap qalýyna septigin tıgizetin bastapqy qadam retinde qarastyramyz. Gaz óńdeý, munaı hımııasy, energetıka ınfraqurylymy jáne jańartylatyn qýat kózderi sekildi salalarda seriktestik aıasyn keńeıtýge aıtarlyqtaı múmkindik bar. Álemdegi eń iri ýran óndirýshi retinde Qazaqstan atom energııasyn beıbit maqsatta paıdalanýda mol áleýetke ıe. Álemdik energetıka sektorynda shaǵyn modýldi reaktorlardyń mańyzy zor. Bizge de osyǵan aıryqsha mán bergen jón. Qazaqstan Koreıamen osy salada ózara tıimdi yntymaqtastyqty jolǵa qoıýǵa ázir, — dedi Qasym-Jomart Toqaev.
Eske sala keteıik, Qasym-Jomart Toqaev Koreıa Respýblıkasyna memlekettik saparmen bardy.
Prezıdent Qasym-Jomart Toqaev Koreıanyń birqatar azamatyn marapattady.
Toqaev pen Pan Gı Mýn BUU reformasy týraly pikir almasty.
