Toqaev Qazaqstandy tsıfrlandyrýda Japonııamen yntymaqtastyqty qalyptastyrýdy usyndy
ASTANA. QazAqparat - Parlament Senatynyń tóraǵasy Qasym-Jomart Toqaev Japonııa Keńesshiler Palatasy Shet elderdi damytýǵa resmı kómek jónindegi Arnaıy komıtettiń tóraǵasy Sıgekı Ivaı bastaǵan delegatsııany qabyldady, dep habarlady búgin QR Parlamenti Senatynyń baspasóz qyzmeti.
Q.Toqaev ekijaqty qatynastardyń negizi maqsattar men qundylyqtar ortaqtyǵynan, sondaı-aq eki eldiń kóshbasshylary arasynda ornaǵan senimdi únqatysýdan quralatynyn atap ótti. Senat tóraǵasy Memleket basshysynyń bastamasymen ázirlengen «Tsıfrlyq Qazaqstan» baǵdarlamasyn iske asyrýǵa qatysýdy, sondaı-aq BUU aıasyndaǵy «Jasyl» tehnologııalardy damytý jónindegi ortalyqty qoldaýdy usyndy.
Senat basshysy Astanada halyqaralyq qarjy ortalyǵyn qurý jónindegi jumystar týraly japon delegatsııasyn habardar etti.
«EKSPO-2017 aıasyndaǵy Ortalyqtyń qatysýshylaryna bıznesti júrgizý úshin qolaıly jaǵdaılar jasalady, Astana halyqaralyq qarjy ortalyǵynda brıtan quqyqtarynyń qaǵıdattaryna negizdelgen sot júıesi qyzmet etetin bolady. Osyǵan baılanysty japondyq áriptesterdi jańa halyqaralyq qarjy qurylymynyń jumysyna atsalysýǵa shaqyramyz», - dedi Q.Toqaev.
S.Ivaı qazaqstandyqtardy EKSPO-2017 halyqaralyq kórmesiniń tabysty ótýimen quttyqtady.
«Bul tarıhı oqıǵa. Kóptegen elder bolashaqtyń energııa salasynda bilimimen jáne tájirıbesimen almasýdyń tıimdi múmkindigine ıe boldy», - dedi ol.
Japon parlamentshisi 2025 jyly Osaka EKSPO halyqaralyq kórmesin qabyldaǵysy keletinin aıta kelip, Japonııa kandıdatýrasyn qoldaý jónindegi ótinishin jetkizdi.
Q.Toqaev Qazaqstannyń parlamentaralyq baılanystardy damytýǵa múddeli ekenin atap ótip, japon áriptesterin sapar almasýdy jıiletýge shaqyrdy.
