Toqaev Qazaqstan-Slovenııa bıznes keńesin qurýdy usyndy
ASTANA. KAZINFORM – Qazaqstan men Slovenııa bıznes keńesin qurý qajet. Bul týraly Aqordada elimizge resmı saparmen kelgen Slovenııa Prezıdenti Natasha Pırts-Mýsarmen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
- Qazir ǵana óte jemisti kelissóz ótkizdik. Tipti halyqaralyq ahýalǵa qatysty óte sezimtal sektorlar da talqyǵa tústi. Árıne, biz barynsha oń nátıjege qol jetkizýge baǵyttalǵan birlesken kúsh-jigerden, sonymen qatar ózara yntymaqtastyqtan aınymaımyz. Slovenııa biz úshin Eýropadaǵy óte mańyzdy seriktes sanalady jáne men atap ótken barlyq aspektige qol jetkizý úshin barlyq kúsh-jigerimizdi jumsaımyz. Osyǵan baılanysty erteń bıznes forýmǵa baryp, sizderdiń bıznesmenderińizdiń, sonymen qatar qazaqstandyq bıznesmenderdiń aldynda elimizdegi bıznes-qoǵamdastyqtardyń ónimderin usynbaqpyn, - dedi Prezıdent.
Memleket basshysynyń aıtýynsha, Slovenııa prezıdentimen shaǵyn quramdaǵy kelissóz barysynda aldaǵy yntymaqtastyq úshin saýda men ınvestıtsııa, atom energetıkasy, tranzıt jáne logıstıka, jańaratyn energııa kózderi men jasyl ósim, densaýlyq saqtaý, tsıfrlandyrý, týrızm syndy mańyzdy salalar atalǵan.
- Olardyń qatarynda munaı men gazdyń da yntymaqtastyǵymyzdyń basty ári mańyzdy aspektisi bolýy tıistigin durys atap óttińiz. Biz Qazaqstanda Slovenııa bıznesi úshin qolaıly jaǵdaı jasaýǵa, retteýshilik, ashyqtyq, ınvestıtsııalyq qorǵanys jáne ekonomıkany ártaraptandyrýdy qosa alǵanda asa mańyzdy jobalardy qoldanýǵa nıettimiz. Men turaqty negizde jumys isteıtin bıznes keńes belgileýdi nemese qurýdy usyndym. Bul keleshektegi jumys úshin asa mańyzdy qadam bolar edi, - dedi Qasym-Jomart Toqaev.
Buǵan deıin Aqordada elimizge resmı saparmen kelgen Slovenııa Prezıdenti Natasha Pırts-Mýsardy Memleket basshysy Qasym-Jomart Toqaev qarsy alǵanyn jazǵan edik.