Toqaev: Qazaqstan-Reseı qarym-qatynasy - memleketaralyq baılanystardyń etalony
«Ulyqtaý rásimi ótkennen keıingi qysqa ǵana ýaqyt ishinde shaqyrǵany úshin Vladımır Vladımırovıch Pýtınge rızashylyǵymdy bildiremin. Bul - meniń Memleket basshysy retindegi alǵashqy saparym. Elderimiz arasyndaǵy myzǵymas dostyq dánekerligin, odaqtastyqty jáne strategııalyq seriktestikti rastaý múmkinshiligine qýanyshtymyn. Tuńǵysh Prezıdentimiz - Ult kóshbasshysy Nursultan Nazarbaev Qazaqstan men Reseıdiń Qudaı qosqan kórshiler ekenin aıtqan bolatyn. Biz barlyq ýaqytta da qos halyqtyń túbegeıli múddesi úshin birge bolamyz», - dedi Qazaqstan Prezıdenti.
Memleket basshysy eki el arasynda bastapqy kezeńnen-aq qarqyndy saıası dıalog ornaǵanyn jáne únemi qoldaýǵa ıe bolyp kelgenin basa aıtty. Sonymen qatar, N.Nazarbaev pen V.Pýtın qos eldiń yntymaqtastyǵyn joǵary deńgeıge kótergenine nazar aýdartty.
«Tatý kórshilik jáne ózara qurmet qaǵıdaty negizinde, konstrýktıvti túıinde sheshe almaǵan másele joq. Búginde qazaqstandyq-reseılik qarym-qatynas memleketaralyq baılanystardyń etalony retinde qyzmet ete alady. Elderimizdiń odaqtastyǵy men strategııalyq seriktestigin nyǵaıtý taqyryby aldaǵy kelissózderdiń basty taqyryby bolady dep oılaımyn. Biz UQShU boıynsha senimdi odaqtaspyz. Ózara, onyń ishinde saýda-ekonomıkalyq, ınvestıtsııalyq ǵylymı-tehnıkalyq, mádenı-gýmanıtarlyq yntymaqtastyq máseleleri boıynsha is-qımyldy tereńdetý úshin zor áleýetimiz bar»,- dedi Qazaqstan Prezıdenti.
Qasym-Jomart Toqaev Reseı Qazaqstannyń jetekshi saýda seriktesi sanalatynyna da nazar aýdardy.
«Ekijaqty taýar aınalymy jyl saıyn ósip keledi jáne ol 2018 jyly 17,6 mlrd dollardy qurady. Qazaqstandaǵy sheteldikterdiń qatysýy bar árbir úshinshi kásiporyn - reseılik, al olardyń jalpy sany 9 myńnan asyp jyǵylady. Elderimiz kópjaqty halyqaralyq jáne óńirlik alańdarda ózara tyǵyz is-qıyldy jolǵa qoıyp, kúshterin úılestiredi. Búginde EAEO qurylymdary eýrazııalyq keńistiktegi ıntegratsııalyq protsesterdiń qozǵaýshy kúshi qyzmetin atqarady», - dedi Memleket basshysy.