Toqaev: Qazaqstan-Reseı qarym-qatynasy jan-jaqty strategııalyq áriptestik pen odaqtastyq deńgeıine kóship jatyr

ASTANA. KAZINFORM — Qazaqstan men Reseı — sapaly ári mazmundy strategııalyq áriptestik pen odaqtastyq qura alǵan elder. Reseıdiń «Rossııskaıa gazeta» basylymyna shyqqan «Máńgilik dostyq — halyqtarymyzǵa jol silter temirqazyq» atty avtorlyq maqalasynda Prezıdent Qasym-Jomart Toqaev osyndaı oı aıtady. 

Memleket basshysy mundaı yntymaqqa eki halyqtyń qazirgideı týrbýlentti, boljap bolmaıtyn kezeńdi birlesip eńserýge degen sanaly umtylysy negiz bolyp turǵanyn aıtady.

— Basqasha aıtqanda, máńgilik dostyq — eki memleket pen onyń halqy úshin temirqazyq. Eki eldiń qarym-qatynasy únemi jetilip kele jatqanymen, turaqtylyǵymen erekshelenedi. Óıtkeni baılanystarymyz tereń senimge, qurmet pen teńdikke negizdelgen. Halyqtarymyzdyń bolashaǵy aldyndaǵy ózara jaýapkershilik ekijaqty yntymaqtastyqtyń kún tártibinde turǵan búkil máseleleriniń sheshimin tabýǵa múmkindik beredi. Meniń túsinigimshe, Qazaqstan men Reseıdiń strategııalyq áriptestigi men odaqtastyǵy eýrazııalyq qaýipsizdik júıesin qurýdyń asa mańyzdy faktory bolyp otyr, — dep jazady Qasym-Jomart Toqaev.

Prezıdent Astana men Máskeýdiń qarym-qatynasy jan-jaqty strategııalyq áriptestik pen odaqtastyq deńgeıine kóship jatqanyn atap ótedi.

— Ekijaqty yntymaqtastyqtyń barsha jetistikteri prezıdent Vladımır Vladımırovıch Pýtınniń osy baǵyttaǵy jigerli, ónimdi qyzmetimen tyǵyz baılanysty. Qazaqstanda ol jahandyq aýqymdaǵy memleket qaıratkeri retinde qaltqysyz qurmetke ıe. Onyń esimi álemniń talaı elindegi saıasatkerler men qarapaıym adamdardyń aýzynan túspeıdi, — deıdi Memleket basshysy. 

Aıta ketelik Prezıdent Qasym-Jomart Toqaev 11-12 qarashada Reseı Federatsııasyna memlekettik saparmen barady.