Toqaev: Qazaqstan naryqqa kirýge nıetti qytaı kompanııalaryna qolaıly jaǵdaı jasaýǵa daıyn
ASTANA. KAZINFORM – Qazaqstan óz naryǵyna kirýge nıetti qytaı kompanııalary úshin qolaıly jaǵdaı jasaýǵa daıyn. Bul týraly Qytaı Halyq Respýblıkasynyń Tóraǵasy Sı Tszınpınmen kelissózderden keıingi baspasózge arnalǵan málimdeme barysynda Memleket basshysy Qasym-Jomart Toqaev aıtty.
«Qazaqstan men Qytaıdyń myzǵymas saıası qatynastary ózara senim men qoldaý rýhynda damyp kele jatyr. Eki el arasynda sheshimin tappaǵan eshqandaı túıtkil joq. Sondyqtan kúsh biriktire otyryp, saýda-ekonomıkalyq, ǵylymı-tehnıkalyq jáne mádenı-gýmanıtarlyq áriptestikti jandandyrýǵa nıettimiz. Biz Tóraǵa Sı Tszınpın ekeýimiz jańa ǵana birlesken málimdemege qol qoıdyq. Qujatta eki el qatynastarynyń jetistikteri jáne aldaǵy josparlary keńinen qamtylǵan», - dedi Memleket basshysy.
Qasym-Jomart Toqaev Qytaı Qazaqstannyń basty saýda seriktesi ekenin basa aıtty.
«Byltyr elderimiz arasyndaǵy saýda kólemi 41 mlrd dollar boldy. Aldaǵy ýaqytta taýar aınalymyn eseleı túsemiz. Buǵan áleýetimiz jetkilikti. Qytaı – bizdiń negizgi sheteldik ınvestorlarymyzdyń biri. Keıingi 15 jylda bul elden Qazaqstanǵa 25 mlrd dollarǵa jýyq ınvestıtsııa tartyldy. Byltyr Qazaqstan ekonomıkasyna quıylǵan qytaı ınvestıtsııasynyń kólemi 16 paıyzǵa ósip, 1,8 mlrd dollarǵa jetti. Bul kórsetkishti ulǵaıtýǵa eki tarap ta múddeli», - dedi Qazaqstan Prezıdenti.
Memleket basshysynyń aıtýynsha, búginde quny 14,5 mlrd dollar bolatyn 45 joba júzege asyrylyp jatyr. Jalpy, qytaı kapıtalynyń úlesi bar kásiporyndar sany 4 700-den asady.
«Biz ózara tıimdi ınvestıtsııalyq jobalardy odan ary júzege asyrýdyń mańyzyn atap óttik. Naqtyraq aıtqanda, energetıka, ınfraqurylym, aýyl sharýashylyǵy, óndiris, qarjy, kólik, aeroǵarysh ónerkásibi jáne ІT salalaryna toqtaldyq. Qazaqstan óz naryǵyna kirýge nıetti qytaı kompanııalary úshin qolaıly jaǵdaı jasaýǵa daıyn», - dedi Qasym-Jomart Kemeluly.
