Toqaev: Qazaqstan men Reseı qarym-qatynasy jańa deńgeıge kóterildi
ASTANA. KAZINFORM — Memleket basshysy XXII Qazaqstan – Reseı óńiraralyq yntymaqtastyq forýmyna qatysty. Bul týraly Aqorda málim etti.
Prezıdent Qasym-Jomart Toqaev pen Prezıdent Vladımır Pýtın Omby qalasynda ótip jatqan XXII Qazaqstan — Reseı óńiraralyq yntymaqtastyq forýmynyń plenarlyq sessııasyna qatysty. Bıylǵy basqosý «Jahandyq logıstıka ekojúıesin qalyptastyrý: Reseı-Qazaqstan yntymaqtastyǵynyń jańa kókjıegi» taqyrybyna arnalyp otyr. Memleket basshysy, eń aldymen, Uly Otan Soǵysynyń ardagerleri, sonyń ishinde ákesi Kemel Toqaev týraly estelikterdi kózdiń qarashyǵyndaı saqtaǵany úshin Reseı Prezıdenti men Omby oblysynyń basshylyǵyna rızashylyǵyn bildirdi. Maıdanger Kemel Toqaev Ekinshi Belarýs maıdanynyń quramynda júrip, Polsha jerinde alǵan aýyr jaraqatynan keıin osy qalada emdelgen edi. Memleket basshysy óńirlerdiń is júzindegi yqpaldastyǵy ekijaqty kún tártibiniń mazmunyn baıytyp, Qazaqstan men Reseı yntymaqtastyǵynyń qarqyndy damýyna tyń serpin berip otyrǵanyn atap ótti.
— Búgingi tańda memleketterimizdiń qarym-qatynasy múldem jańa deńgeıge kóterildi. Ol — memleketter basshylarynyń, úkimet jetekshileri men jergilikti bılik basshylarynyń, sondaı-aq eki el parlamentteriniń ortaq kúsh-jigeriniń nátıjesi. Meniń byltyr qarasha aıynda Reseıge jasaǵan memlekettik saparym men Prezıdent Vladımır Pýtınniń bıyl mamyr aıyndaǵy elimizge memlekettik sapary bul turǵyda tarıhı mánge ıe. Qos sapardyń qorytyndysy boıynsha qol qoıylǵan Memleketaralyq qarym-qatynasty jan-jaqty strategııalyq seriktestik jáne odaqtastyq deńgeıine deıin jetkizý jónindegi deklaratsııa, sondaı-aq Dostyq pen tatý kórshiliktiń jeti negizi týraly birlesken málimdeme elderimizdiń aldaǵy ondaǵan jyldardaǵy jasampaz yntymaqtastyǵy men ósip-órkendeýine berik negiz qalady. Qazaqstan men Reseı qarym-qatynasy barlyq baǵytta nyǵaıyp kele jatyr dep tolyq senimmen aıtýǵa bolady. Reseı — Qazaqstannyń iri saýda seriktesi. Byltyr ekijaqty taýar aınalymy 28 mıllıard dollarǵa jýyqtady. Ortaq kúsh-jigerdiń arqasynda bul kórsetkish udaıy ósip keledi: bıylǵy bes aıda ózara saýda-sattyq kólemi byltyrǵy uqsas kezeńmen salystyrǵanda shamamen 10 paıyzǵa jýyq artty, — dedi Qasym-Jomart Toqaev.
Aıta keteıik, Prezıdent Qazaqstan–Reseı óńiraralyq yntymaqtastyq forýmyna qatysý úshin Ombyǵa bardy.
