Toqaev: Qazaqstan men Qytaıdyń saýda aınalymyn $100 mlrd-qa jetkizý kózdelip otyr
ASTANA. KAZINFORM — Prezıdent Qasym-Jomart Toqaev Qazaqstan men Qytaıdyń máńgi jáne jan-jaqty strategııalyq seriktestiginiń tarıhı negizi berik ári tatý kórshilik pen ózara senim rýhynda tyń qarqynmen damyp kele jatqanyna nazar aýdardy. Bul týraly Aqorda málim etti.
— Búginde qazaq-qytaı qarym-qatynasy sapalyq turǵydan jańa deńgeıge kóterildi dep aıtýǵa bolady. Bul qurmetti Tóraǵa Sı Tszınpın myrzanyń tikeleı qoldaýynyń arqasy dep aıtsaq, artyq bolmas. Biz máńgilik dos ári senimdi seriktes retinde yntymaqtastyǵymyzdyń jańa «altyn 30 jyldyq» kezeńine qadam basyp jatyrmyz.Jalpy, Qytaı — Qazaqstannyń eń iri saýda seriktesi. Byltyr eki eldiń taýar aınalymy rekordtyq mejege jetip, 50 mıllıard dollarǵa jýyqtady. Úkimetterimiz bul kórsetkishti 100 mıllıard dollarǵa deıin jetkizý úshin belsendi jumys istep jatyr. Investıtsııa salasyndaǵy yntymaqtastyǵymyz da turaqty damyp keledi. Qytaı Qazaqstan ekonomıkasyna 29 mıllıard dollardan astam qarjy quıdy. Osylaısha, elimizdiń asa iri ınvestorlarynyń birine aınaldy. Qazir Qazaqstanda Qytaıdyń qatysýymen 9 myńnan astam kásiporyn tabysty jumys isteýde, — dedi Memleket basshysy.
Prezıdent ónerkásip, tsıfrlandyrý, «aqyldy qalalar» men spýtnıktik tehnologııalardy damytý, aýyl sharýashylyǵy, densaýlyq saqtaý jáne bilim berý salalaryndaǵy seriktestik dáıekti túrde nyǵaıyp kele jatqanyn jetkizdi. Onyń aıtýynsha, Investıtsııalardy kótermeleý jáne ózara qorǵaý týraly kelisimdi ratıfıkatsııalaý ekijaqty yntymaqtastyqty jandandyrýǵa quqyqtyq turǵydan yqpal etti.
— Іskerlik baılanystardyń keńeıýine elderimiz arasynda ornaǵan vızasyz rejım de eleýli úles qosty. Qazirgi kezde Qazaqstanda qomaqty ınvestıtsııa tartyp, iri jobalardy iske asyrýǵa barynsha ońtaıly jaǵdaı jasalǵan dep senimmen aıtýǵa bolady. Bıyl 1 shildede kúshine engen Konstıtýtsııamyzdyń negizgi erejeleri elimizdiń ınvestıtsııalyq áleýetin nyǵaıtýǵa myqty quqyqtyq negiz qalady, — dedi Qasym-Jomart Toqaev.
Eske sala keteıik, Prezıdent Qasym-Jomart Toqaev Almatyda «Qazaqstan – Qytaı» ınvestıtsııalyq forýmyna qatysyp jatyr.
Jıyn bastalmas buryn forým qonaqtary Mańǵystaý oblysyndaǵy qaıǵyly oqıǵa saldarynan qaza tapqan áskerı qyzmetshilerdi bir mınýt únsizdikpen eske alyp, rýhyna taǵzym etti.
