Toqaev Qazaqstan quramasyn Kóshpendiler oıyndaryndaǵy tabysty ónerimen quttyqtady
ASTANA. KAZINFORM — Memleket basshysy Qasym-Jomart Toqaev Qazaqstan ulttyq quramasyn VI Dúnıejúzilik kóshpendiler oıyndarynda tabysty óner kórsetýimen quttyqtady. Bul týraly Qazaqstan Respýblıkasy Prezıdentiniń keńesshisi — Prezıdenttiń baspasóz hatshysy Aıbek Smadııarov habarlady.
— Prezıdent osynaý joǵary nátıjege sportshylarymyz taısalmas tabandylyqtyń, janqııarlyq eńbek pen muqalmas erik-jigerdiń arqasynda jetkenin atap ótti. Memleket basshysy chempıondar men júldegerlerge, bapkerler quramyna jáne barsha mamandarǵa shynaıy rızashylyǵyn jetkizip, mundaı eren jetistikter Qazaqstannyń ulttyq sport túrleri damyǵan el retinde halyqaralyq bedelin asqaqtata túsetinin aıtty. Qasym-Jomart Toqaev sportshylarymyzdyń eń bedeldi saıystarda bıik belesterdi baǵyndyra berýine tilektestik bildirdi, — delingen habarlamada.
Eske sala keteıik, Qazaqstan quramasy Dúnıejúzilik kóshpendiler oıyndaryn jalpykomandalyq esepte birinshi orynmen aıaqtady.
Baıraqty dodanyń qorytyndysy boıynsha qazaqstandyq sportshylar 74 medal jeńip aldy. Onyń ishinde 32 altyn, 20 kúmis jáne 22 qola júlde bar. Jalpykomandalyq esepte 30 altyn medal ıelengen Qyrǵyzstan ekinshi orynǵa, jeti altyn júldesi bar Reseı úshinshi orynǵa turaqtady.
