Toqaev: Qazaqstan halqy Assambleıasynyń 30 jyldyǵy — egemendik tarıhyndaǵy aıtýly oqıǵa

ASTANA. KAZINFORM — Qazaqstan halqy Assambleıasynyń 30 jyldyǵy — egemendik tarıhyndaǵy aıtýly oqıǵa. Bul týraly Qazaqstan halqy Assambleıasynyń HHHІV sessııasynda Memleket basshysy Qasym-Jomart Toqaev aıtty.

— Qazaqstan halqy Assambleıasynyń 30 jyldyǵy — egemendik tarıhyndaǵy aıtýly oqıǵa. Bul mereıtoı ár azamattyń baq-berekesin arttyrý jolynda ultymyzdy uıystyratyn mańyzdy beleske aınalady dep senemin. Biz halqymyzdyń bereke-birligin nyǵaıtýǵa úles qosqan azamattarymyzǵa árdaıym qurmet kórsetemiz. Otyz jylda jetken jetistikterimiz osyndaı abzal jandardyń eseli eńbeginiń jemisi ekeni sózsiz. Jurtymyz úshin eń úlken marapat — eldiń tynyshtyǵy. Shyn máninde, qoǵamda tatýlyq bolmasa, basqa jumystyń bári beker bolmaq. Bereke-birligimizdi saqtaı almasaq, qasterli Táýelsizdigimizdiń baıandy bolýy da ekitalaı. Elimizdegi turaqtylyqty nyǵaıtý úshin Assambleıa músheleri tabandy eńbek etip keledi. Men barshańyzǵa shyn júrekten alǵys aıtamyn. Aldaǵy ýaqytta da el ıgiligin arttyrýǵa mol úles qosa beresizder dep senemin. Assambleıanyń mereıtoıy qutty bolsyn! Birligimiz bekem bolsyn! Elimiz aman, jurtymyz tynysh bolsyn! Qasterli Otanymyz — Qazaqstan jasaı bersin! , — dep túıindedi sózin Memleket basshysy.

Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.

Sessııa barysynda Memleket basshysy etnosaralyq qatynas máselesin eshqashan saıasat quralyna aınaldyrýǵa bolmaıtynyn, el ishine iritki salǵysy keletinder zańǵa sáıkes qatań túrde jaýapqa tartylatynyn bas aıtty.