Toqaev Qazaqstan-Germanııa óndiristik quzyretter ortalyǵy jelisin qurýdy usyndy
ASTANA. KAZINFORM – Qasym-Jomart Toqaev Qazaqstanda jasandy ıntellektini engizý jáne tsıfrlyq transformatsııa ulttyq basymdyq retinde aıqyndalǵanyna nazar aýdardy, dep jazady Aqorda.
Sondaı-aq elimizde «Derekterdi óńdeý ortalyqtarynyń alqabyn» qurý qolǵa alynǵanyn aıtty. Atalǵan joba keleshekte iri esepteý qýaty bar habqa aınalady.
– Germanııa ónerkásipke arnalǵan baǵdarlamalyq qamtamasyz etý, avtomatızatsııa, kıberqaýipsizdik, ınjenerııa jáne qoldanbaly zertteýler salalarynda myqty. Osy artyqshylyqtary bizdiń órshil maqsatymyzǵa saı keledi. Nemis kompanııalaryn derekterdi óńdeý ınfraqurylymyn damytýǵa atsalysyp, qazaqstandyq seriktestermen birge taý-ken, energetıka jáne logıstıka salalaryna arnalǵan jasandy ıntellekt sheshimderin ázirleýge shaqyramyn, – dedi Prezıdent.
Memleket basshysy adam kapıtalyn damytý taqyrybyn da qozǵady. Qasym-Jomart Toqaev Germanııanyń dýaldy kásiptik bilim berý júıesin joǵary baǵalap, akademııalyq jáne kásibı baılanystardy tereńdetýge negiz baryn eske saldy.
– Qazaqstan-Germanııa óndiristik quzyretter ortalyǵynyń jelisin qurýdy usynamyz. Ony ozyq jobalardy júzege asyrýmen tikeleı baılanystyrýǵa bolady. ıAǵnı árbir iri ınvestıtsııalyq joba kadr daıarlaıtyn alań bolýǵa tıis degen qarapaıym qaǵıdatqa súıengen jón. Sonda ǵana kapıtal bilimge, al bilim ornyqty ekonomıkalyq ósimge ulasady, – dedi Prezıdent.
Aıta keteıik, Qasym-Jomart Toqaev pen Frank-Valter Shtaınmaıer Birlesken deklaratsııa qabyldady.
