Toqaev: Qazaqstan elektr energııasyn qymbatqa satyp alyp, arzanǵa qaıtaryp otyr

ASTANA. KAZINFORM – Qazaqstan úshin shıkizattyq artyqshylyǵyn turaqty energetıkalyq jáne tehnologııalyq progreske aınaldyrý asa mańyzdy. Bul týraly Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.

Qytaı biryńǵaı ulttyq elektr energııasy naryǵyn qalaı quryp jatyr
Foto: Canva

- Qazirgi jaǵdaıda elektr energııasymen qamtamasyz etilý árbir memlekettiń básekege qabilettiligin, tipti ekonomıkalyq egemendigin aıqyndaıtyn sheshýshi faktorǵa aınaldy. Búgingi kezeńdi, shyn máninde, «elektr energııasynyń dáýiri» dep ataýǵa bolady. Qazaqstan úshin shıkizattyq artyqshylyǵyn turaqty energetıkalyq jáne tehnologııalyq progreske aınaldyrý asa mańyzdy. Ashyǵyn aıtqanda, bul baǵytta problemalar jetkilikti, - dedi Prezıdent.

Memleket basshysynyń paıymynsha, elimizde kásibı energetıkter saýsaqpen sanarlyq, al energetıka máselelerine arnalǵan forýmdar men pikirtalastar jıi ári aýqymdy deńgeıde ótkiziledi.

Sonymen qatar Qazaqstannyń energetıka salasy jyl saıyn eleýli tapshylyqqa tap bolady. Sonyń saldarynan qys mezgilindegi elektr energııasyna suranys sharyqtaıtyn kezeńderde kórshi elderden elektr qýaty qymbat baǵamen satyp alynady. Al jazda sol elektr energııasy kerisinshe, aıtarlyqtaı tómen baǵamen keri qaıtarylady.

- Mine, ondaǵan jyl boıy jalǵasyp kele jatqan qarapaıym ǵana «bıznes» osy. Maǵan munyń energetıka salasyndaǵy qalypty tájirıbe ekenine sendirýge tyrysady. Sondyqtan kezinde Balqashtaǵy jylý elektr ortalyǵynyń qurylysyn bastap qoıǵan jerinen toqtatyp tastaǵany da tańǵalarlyq emes. Qazir Túrkistan, Qyzylorda, Almaty jáne Ekibastuz qalalarynda jańa elektr qýattaryn iske qosý merzimi de keıinge shegerilip jatyr, - dedi Qasym-Jomart Toqaev.

Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.