Toqaev: Qazaqstan 2029 jylǵa qaraı 100 myń sheteldik stýdentti qabyldaıdy
ASTANA. KAZINFORM — Memleket basshysy Germanııanyń mańdaıaldy joǵary oqý oryndary rektorlarymen jáne ǵylymı ınstıtýt jetekshilerimen kezdesti. Bul týraly Aqordanyń baspasóz qyzmeti habarlady.
Qasym-Jomart Toqaev Qazaqstan men Germanııanyń bilim salasyndaǵy tabysty yntymaqtastyǵyna toqtaldy.
Onyń aıtýynsha, bul jetistikterge Prezıdent Frank-Valter Shtaınmaıerdiń 2023 jyly maýsym aıyndaǵy saparynan bastaý alǵan saıası dıalogtyń nyǵaıýy septigin tıgizdi.
– Búginde Qazaqstannyń 45 ýnıversıteti Germanııadaǵy 100-ge jýyq seriktespen yntymaqtastyq ornatqan. Eki myńǵa jýyq qazaqstandyq stýdent Germanııada bilim alady. Qazirgi kezde elimizde sheteldik ýnıversıtetterdiń 30-dan astam fılıaly men seriktes ókildigi bar. Bul kórsetkishter kóp nárseni ańǵartady. Degenmen olar yntymaqtastyǵymyzdyń qanshalyqty tereń ekenin tolyq kórsetpeıdi. Eń bastysy, qolǵa alǵan isimiz óte mańyzdy. Yqpaldastyǵymyzdyń mazmuny túbegeıli ózgerdi, – dedi Prezıdent.
Memleket basshysy elimizdi Eýrazııa men odan tysqary jerlerdegi jetekshi akademııalyq jáne ǵylymı-zertteý ortalyǵy retinde qalyptastyrý strategııalyq basymdyq retinde aıqyndalǵanyn aıtty.
– Biz dástúrli qalypty ózgertip jatyrmyz. Jastardy shetelge bilim alýǵa jiberýdiń ornyna Qazaqstanǵa ozyq halyqaralyq joǵary oqý oryndarynyń standarttary men baǵyttaryn ákelýge kiristik. Elimizde Kardıff ýnıversıtetiniń, KAIST jáne Kolorado taý-ken mektebiniń ókildikteri jumys isteıdi. Qazir elimizde 40 myńnan astam sheteldik stýdent bilim alady. 2029 jylǵa qaraı olardyń sanyn 100 myńǵa deıin arttyrýdy josparlap otyrmyz. Qazaqstan Bolon protsesine múshe el retinde bilim berý sapasy men ǵylymı dárejelerdiń sáıkestigin qamtamasyz etetin eýropalyq standarttardy qoldanady, – dedi Qasym-Jomart Toqaev.
