Toqaev: Qazaq memleketiniń basshysy retinde men úshin táýelsizdik — bárinen qymbat

QYZYLORDA. KAZINFORM — Qazaqstan barshaǵa túsinikti ádil saıasat ustanymyn árdaıym saqtaıdy. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

— Qazaqstan — jaýapkershiligi joǵary «orta derjava» jáne jer kólemi boıynsha ıslam álemindegi asa iri memleket. Biz barshaǵa túsinikti, ıaǵnı aqylǵa qonymdy jáne ádil saıasatty jaqtaımyz, osy ustanymdy árdaıym saqtaımyz. Syrtqy saıasattaǵy is-áreketimizdiń bári bir ǵana maqsatty kózdeıdi. Eń bastysy, Qazaqstannyń jeriniń tutastyǵyn, qaýipsizdigi men egemendigin qamtamasyz etýimiz kerek. Qazaq memleketiniń basshysy retinde men úshin táýelsizdik — bárinen qymbat! Bul — mereıtoı kezindegi uran emes, qazirgi dúrbeleńge toly zamanda ulttyq strategııamyzdyń negizgi qaǵıdasy. Men «Táýelsizdik degenimiz — eń aldymen, jalpyulttyq birlik pen kelisim» ekenin únemi aıtyp júrmin, — dedi Qasym-Jomart Toqaev.

Osy oraıda Prezıdent Qazaqstan halqy el birligin saqtap, ósip-órkendegen, abyroı-bedeli joǵary ári qýatty memleket qurýdy basty mindet retinde sanaýy qajet ekenin aıtty.

— Osy maqsatqa strategııalyq turǵydan qarap, parasatty, dana halyq ekenimizdi kórsetýimiz kerek, — dedi Memleket basshysy.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalady.

Budan buryn Prezıdent Qazaqstan tarıhyna arnalǵan jańa jeti tomdyq qashan daıyn bolatynyn aıtty.