Toqaev: qate sheshimderdiń saldary qandaı teris nátıjelerge ákep soqtyrǵanyn kórip otyrmyz
ASTANA. KAZINFORM – Úkimet bul saladaǵy damyǵan eldermen strategııalyq seriktestik ornatýǵa tıis. Bul týraly Qazaqstan halqyna Joldaýyn jarııalaý kezinde Prezıdent Qasym-Jomart Toqaev málim etti.
- Sondaı-aq sarapshylar men mamandardyń pikirine súıensek, ulttyq túrli-tústi jáne sırek kezdesetin metaldardyń qoryn qalyptastyrý qajettiligi paıda bolyp jatyr. Túpki maqsat – elimizdi jahandyq óndiris tizbegine qosý. Eksporttyq saıasatymyz da osy maqsatqa saı júrgizilýi kerek. Úkimet bul saladaǵy damyǵan eldermen strategııalyq seriktestik ornatýǵa tıis, - dedi Qasym-Jomart Toqaev.
Prezıdenttiń aıtýynsha, jańadan ashylǵan kásiporyndar jumys istep turǵan jergilikti bıznes nysandaryna orynsyz kedergi keltirmeýi kerek. Investorlardy tartqan kezde de osy máselege mán berip, ár aımaqty, ár salany muqııat zerdelegen jón.
- Qate sheshimderdiń saldary qandaı teris nátıjelerge ákep soqtyrǵanyn kórip otyrmyz. Máselen, elimizde metall óndiretin Qarmet degen iri kásiporyn bar. Soǵan qaramastan, taǵy úsh oblysta dál osyndaı óndiris oryndaryn ashý josparlanǵan. Osy kásiporyndardyń ónimi naryqtyń suranysyna ıe bola ma? Bul suraqqa naqty jaýap joq sııaqty. Sondyqtan osyndaı úılesimsiz sheshimderdiń paıdasy kúmándi ekenine daý joq. Mekemearalyq baılanysty nyǵaıtpasaq, ekonomıkamyz óz áleýetin joǵaltyp alady. Árbir aımaq óziniń basymdyqtaryn aıqyndap, soǵan saı jumys isteýi kerek, - dedi Memleket basshysy.
Qasym-Jomart Toqaevtyń sózine qaraǵanda, osy másele boıynsha Úkimettiń úılestirý rólin áldeqaıda kúsheıtý qajet ekeni anyq. Biraq aımaqtar jekelegen salaǵa nemese kásiporynǵa táýeldi bolyp qalmaýǵa tıis. Sondyqtan óńirde negizgi salany damyta otyryp, onyń aınalasynda jáne ishinde de tolyqqandy birtutas júıe qurý mańyzdy.
- Atap aıtqanda, bilim berý, qoldanbaly ǵylym, logıstıka, qyzmet kórsetý salalaryn, sabaqtas óndiristerdi jáne tehnologııalyq kásipkerlikti damytqan jón. «Halyqtyq qurylys» ár aımaqta osyndaı júıe, ıaǵnı qazirgi tilmen aıtsaq, ekojúıe qurýǵa oń yqpal etetinine senim bar, - dedi Prezıdent.
Buǵan deıin Prezıdent Qasym-Jomart Toqaev Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Joldaýyn jarııalap jatqanyn jazǵan edik.