Prezıdent kásipkerlikke kedergi keltiretin máselelerdi joıýdy tapsyrdy
ASTANA. KAZINFORM — Memleket basshysy Kásipkerlerdiń quqyǵyn qorǵaý jónindegi ýákil Qanat Nurovty qabyldady, dep habarlaıdy Aqordanyń baspasóz qyzmeti.
Prezıdentke bıznes-ombýdsmenniń 2024 jyly atqarǵan jumysynyń nátıjeleri týraly esep berildi.
Qanat Nurov kásipkerlerdiń quqyǵy buzylýyna qatysty kelip túsken 3275 shaǵymnyń 1759-y (53,7%) boıynsha oń sheshim qabyldanǵanyn jetkizdi. Sonyń nátıjesinde 20 mıllıard teńgeden astam shyǵynnyń aldyn alýǵa múmkindik týdy. Jalpy, aryz-shaǵym sany 12 paıyzǵa azaıǵan. Bul ákimshilik ádilet ınstıtýtynyń tıimdiligin kórsetedi.
Memleket basshysynyń tapsyrmasyn oryndaý maqsatynda bıznestiń damýyn tejeıtin basy artyq ákimshilik kedergilerdi anyqtaýǵa jáne joıýǵa basa mán berildi.
Sonymen qatar bıznes-ombýdsmen kásipkerlik qyzmetti retteıtin normatıvtik-quqyqtyq aktilerge ózgerister engizýge qatysty birqatar usynysyn jetkizdi. Keıbir jekelegen jaǵdaıattar boıynsha tıisti retteýshi jáne quqyq qorǵaý organdaryna talap-aryz joldanǵan.
Kezdesý sońynda Prezıdent Qasym-Jomart Toqaev kásipkerlerdiń quqyǵyn qorǵaý sharalaryn odan ári kúsheıtý mańyzdy ekenine nazar aýdardy. Memleket basshysy Kásipkerlikti qorǵaý strategııasyn júzege asyrý aıasynda qordalanǵan problemalardy sheshýge baǵyttalǵan birqatar tapsyrma berdi.
Buǵan deıin Memleket basshysynyń Jarlyǵymen Marǵulan Baımuhan jańa qyzmetke taǵaıyndalǵanyn jazǵan edik.