Toqaev: Kaspıı – memlekettik shekaraǵa baǵynbaıtyn birtutas ekojúıe
ASTANA. KAZINFORM — Qasym-Jomart Toqaev Kaspıı teńizin saqtaýǵa jáne anaǵurlym perspektıvti jobalardyń pýlyn qalyptastyrýǵa halyqaralyq deńgeıde kúsh salý qajet ekenin atap ótti. Bul týraly Aqordanyń baspasóz qyzmeti habarlady.
– Mundaı jobalar Kaspıı akvatorııasy men oǵan quıatyn ózenderdiń alaptaryn da qamtýǵa tıis. Sý aǵynyn, ózen atyraýlary men sýly-batpaqty aýmaqtardy qalpyna keltirip, gıdrotehnıkalyq qurylystardyń jaǵdaıyn jaqsartý kerek. Atalǵan jumystardy granttar, jeńildetilgen nesıe jáne klımattyq qarjylandyrýdyń basqa da arnalary esebinen júrgizýge bolady. Solaı bolýǵa tıis, – dedi Qazaqstan Prezıdenti.
Budan bólek, Memleket basshysy Tegeran konventsııasynyń turaqty Hatshylyǵyn tolyq jasaqtaý óte mańyzdy dep sanaıdy.
– Bizge sheshimderdiń sabaqtastyǵyn qamtamasyz etip, joǵary deńgeıde qol jetkizilgen ýaǵdalastyqtardyń tolyq iske asýyn qadaǵalaıtyn jáne qyzmetin úılestiretin pármendi tetik kerek. Qazaqstan BUU aıasynda Halyqaralyq sý uıymyn qurý bastamasyn jalǵastyrady. Óıtkeni Kaspııdiń ekologııalyq jaı-kúıine basa nazar aýdara otyryp, sý resýrstaryn jahandyq basqarýdyń tıimdiligin arttyrý – barshaǵa ortaq mindet. Sý qaýipsizdigi azyq-túlik, energetıkalyq jáne klımattyq qaýipsizdikpen birge halyqaralyq kún tártibinde laıyqty oryn alýǵa tıis, – dedi Qasym-Jomart Toqaev.
Prezıdent atap ótkendeı, Kaspıı – memlekettik shekaraǵa baǵynbaıtyn birtutas ekojúıe. Sondyqtan halyqaralyq uıymdar jáne qarjy naryqtary aıasynda úılesimdi is-áreket bolmasa, tabysqa jetý múmkin emes.
– Bizde jemisti jumys atqarýǵa qajettiniń bári bar. Saıası dıalog ornaǵan, halyqaralyq-quqyqtyq baza, salalyq ınstıtýttar men aıtarlyqtaı ǵylymı áleýet qalyptasqan. Birlesken kúsh-jigerdiń arqasynda halyqtarymyzdyń tirshilik kózi men baıandy bolashaǵynyń kepili sanalatyn Kaspıı teńizin saqtaı alatynymyzǵa senimdimin, – dedi Memleket basshysy.
Sammıtte Túrikmenstan Prezıdenti Serdar Berdimuhamedov, Ázerbaıjan Prezıdenti Ilham Álıev, Iran Prezıdenti Masýd Pezeshkıan jáne Reseı Prezıdenti Vladımır Pýtın sóz sóıledi.
Aıta ketelik Kaspııdiń biregeı tabıǵatyn saqtaý úshin halyqaralyq qor qurylady.
