Toqaev Kaspıı mańy elderiniń mádenı-gýmanıtarlyq yntymaqtastyǵyn nyǵaıtýdy usyndy

AShHABAD. QazAqparat – Qazaqstan Kaspııdiń árqashan dostyq, tatý kórshilik jáne ózara tıimdi yntymaqtastyq teńizi bolyp qalatynyn qoldaıdy. Bul týraly QR Prezıdenti Qasym-Jomart Toqaev altynshy Kaspıı sammıtinde aıtty, dep habarlaıdy QazAqparat tilshisi.

«Kaspıı mańy elderi ishinde mádenı-gýmanıtarlyq yntymaqtastyqty odan ári nyǵaıtý qajettigi birneshe ret talqylanǵan edi. Osy baǵytta naqty qadamdar jasaıtyn kez keldi dep sanaımyz. Bul bizdiń halyqtarymyzdy jaqyndastyryp qana qoımaı, Kaspııdi zertteýde de ózara is-qımyldy edáýir jaqsartýǵa múmkindik beredi», - dedi Qasym-Jomart Toqaev.

Prezıdenttiń aıtýynsha, Kaspıı mańy elderi arasyndaǵy kóptegen halyqaralyq alańdarda saraptamalyq deńgeıde tıimdi yntymaqtastyq jolǵa qoıylǵan. Sammıtter men kezdesýler qarsańynda saraptamalyq pikirtalastar bolady.

«Sonymen birge «Kaspıı bestigi» taldamalyq qurylymdarynyń konsortsıýmyn qurý paıdaly bolady dep oılaımyn. Onyń ústine, mundaı ózara is-qımyl ekijaqty deńgeıde tabysty júrgizilip keledi. Qazaqstan ata-babalarymyzdyń ortaq ıgiligi men murasy –Kaspııdiń árqashan dostyq, tatý kórshilik jáne ózara tıimdi yntymaqtastyq teńizi bolyp qala berýin qoldaıtynyn erekshe atap ótkim keledi. Іzgi nıet pen ózara talpynys tanyta otyryp, halyqtarymyz ben elderimizdiń órkendeýi men ilgerileýi úshin osy ıgi maqsatqa qol jetkizerimizge senimdimin», - dedi Qazaqstan Prezıdenti.