Toqaev Kaspıı mańy elderiniń ǵylymı áleýetin biriktirýge shaqyrdy
ASTANA. KAZINFORM — Qasym-Jomart Toqaev sammıt qatysýshylarynyń nazaryn birqatar negizgi baǵytqa aýdardy. Bul týraly Aqordanyń baspasóz qyzmeti habarlady.
Prezıdent ekologııalyq qaýip-qaterdi der shaǵynda anyqtap, aldyn alý úshin birizdi ǵylymı tásil kerek dep esepteıdi.
– Kaspıı mańyndaǵy elderde derekterdiń, ǵylymı zertteýler men baqylaýlardyń mol qory bar. Degenmen ol biryńǵaı júıe retinde jumys istese, anaǵurlym tıimdi bolar edi. 2024 jyly Qazaqstan Kaspıı teńizi ǵylymı zertteý ınstıtýtyn qurdy. Keshendi zertteýler júrgizip, beıimdelýdiń ortaq josparyn ázirleý úshin Kaspıı mańy elderiniń ǵylymı ortalyqtary men osy ınstıtýttyń áleýetin tolyqtaı jumyldyrǵan jón, – dedi Qazaqstan Prezıdenti.
Memleket basshysy Kaspıı ekojúıesin basqarýǵa arnalǵan zamanaýı tehnologııalardy qoldanýdyń ózektiligine basa mán berdi.
– Sý resýrstarynyń jaı-kúıi, jaǵalaýdyń ózgerýi, bıoalýantúrlilik, lastaný, ózen aǵyny jáne basqa da negizgi parametrler boıynsha málimetterdi óńdep, taldaý úshin biryńǵaı tsıfrlyq platforma qurý múmkindigin qarastyrýdy usynamyn. Spýtnıktik tehnologııalar, jasandy ıntellekt jáne boljam jasaýdyń zamanaýı júıeleri naqty ýaqyt rejıminde monıtorıng júrgizýge, ekologııalyq syn-qaterlerdi ýaqtyly anyqtap, retteýge múmkindik beredi. Mundaı platforma ǵalymdarymyzdyń, salalyq memlekettik organdardyń jáne halyqaralyq uıymdardyń jumysyna ortaq tsıfrlyq negiz bolady, – dedi Qasym-Jomart Toqaev.
Aıta ketelik Kaspıı ıtbalyqtarynyń sany mıllıonnan 270 myńǵa deıin azaıǵan.
