Toqaev kapıtaldy zańdastyrý týraly: Sózbuıdaǵa salǵan kásipkerlermen áńgime basqasha bolady

ASTANA. KAZINFORM – Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda atymtaı kásipkerlerdiń altyn tizimi týraly aıtty.

«Byltyr bıznes ókilderimen ótken kezdesýde bul másele boıynsha men naqty ustanymdy aıttym. Biz kásip ıelerimen ózara kelisimge keldik, ıaǵnı «kapıtaldy zańdastyrý» úshin mindetti túrde Qazaqstan ekonomıkasyna qarjy salý qajet bolady. Eń bastysy, salynǵan qarjy el ıgiligine jaraýy kerek. Bul talapty normatıvtik turǵydan bekitip alý qajet.
Tıisti reestrge engizilgen kásipkerlermen kelisim jasaǵan kezde memleketke qaıtarylatyn aktıvterdi «zańsyz» dep tanymaý týraly normany bekitýge bolady. Bul – shyn máninde, iri kásip ıeleriniń múddesine saı keletin mańyzdy qadam. Biraq kásipkerler de qarjyny respýblıkalyq bıýdjetke aýdarý máselesine kelgende Úkimetpen jáne Bas Prokýratýramen tyǵyz baılanysta jumys isteýge tıis. Bul – ár teńge úshin saýdalaspaı, qajetti sharanyń bárin óz erkimen jasaý kerek degen sóz», - dedi Prezıdent.

Memleket basshysy kásipkerler osy eldiń azamaty retinde mektep, aýrýhana, stadıon, mýzeı jáne basqa da áleýmettik-mádenı nysandar salýǵa qomaqty qarjy bólýge mindetti ekenin aıtty.

«Mundaı kásipkerlerdiń esimi jomart jandardyń «altyn tizimine» jazylady. Al odan bas tartqan nemese sózbuıdaǵa salǵan kásipkerlerge qatysty áńgime basqasha bolady», - dedi Qasym-Jomart Toqaev.