Toqaev Kantsler Frıdrıh Mertsti elimizge memlekettik saparmen kelýge shaqyrdy
ASTANA. KAZINFORM — Prezıdent pen Kantslerdiń kelissózi eki el delegatsııasy músheleriniń qatysýymen keńeıtilgen quramda jalǵasty. Bul týraly Aqordanyń baspasóz qyzmeti habarlady.
Memleket basshysy Qazaqstan men Germanııanyń strategııalyq seriktestigi berik saıası dıalogqa, ortaq ekonomıkalyq múddege jáne halyqtar arasyndaǵy tyǵyz baılanysqa arqa súıeıtinin aıtty.
— Ózara saýda-sattyq kólemi ótken jyly 13,4 paıyzǵa ulǵaıyp, 4,5 mıllıard dollarǵa jetti. Germanııanyń sońǵy 21 jylda elimizge salǵan ınvestıtsııasy 8 mıllıard dollardy mejeledi. Osy rette germanııalyq ınvestıtsııanyń qaýipsizdigin qamtamasyz etý aıryqsha baqylaýda ekenin aıtqym keledi, — dedi Qasym-Jomart Toqaev.
Kelissóz barysynda saýda-ekonomıkalyq yntymaqtastyqty nyǵaıtý máselesine basa mán berildi.
Búgingi tańda birlesken ınvestıtsııa portfelinde jalpy quny shamamen 54 mıllıard dollar bolatyn 40 ónerkásip jobasy bar.
Bul rette Prezıdent Úkimetaralyq jumys toby men Qazaqstan-Germanııa iskerlik keńesiniń úılesimdi ári nátıjeli qyzmetine oń baǵa berdi.
Memleket basshysy Germanııanyń qazirgi álemdik saıasat pen ekonomıkadaǵy eleýli róline nazar aýdardy. Onyń aıtýynsha, eldiń óndiristik qýaty, myqty ǵylymı mektebi jáne nemis halqynyń eńbekke degen jaýapkershiligi halyqaralyq deńgeıde sózsiz moıyndalǵan.
Sonymen qatar Qazaqstan Prezıdenti men Germanııa Kantsleri mádenı-gýmanıtarlyq yqpaldastyqty keńeıtý, sonyń ishinde bilim men ǵylym salasynda birlesken bastamalardy júzege asyrý máselelerin qarastyrdy.
Taraptar Prezıdent Qasym-Jomart Toqaevtyń Germanııa sapary eki eldiń ıgiligi men gúldenýi jolyndaǵy oń nátıjelerge jetýge yqpal etetinine senim bildirdi.
Kelissóz sońynda Prezıdent Qasym-Jomart Toqaev Kantsler Frıdrıh Mertsti elimizge memlekettik saparmen kelýge shaqyrdy.
Aıta ketelik Qasym-Jomart Toqaev pen Frank-Valter Shtaınmaıer Birlesken deklaratsııa qabyldaǵan edi.
