Toqaev qańtar oqıǵasy kezinde batyrlyq kórsetken volonterler týraly aıtty
«Qańtar oqıǵasyna deıin eldegi jaǵdaıdy ádeıi shaıqaltqandar boldy. Olar túrli joldarmen narazylyq kóńil-kúıin órshitip, qoǵamymyzdy bólshekteý maqsatyn kózdedi. Sondyqtan olardyń kópshiligi qańtar tragedııasyna janama túrde jaýapty. Óıtkeni olar jaǵdaıdyń qalaı shıelenisip jatqanyn, tártipsizdiktiń órship bara jatqanyn kóre tura, kerisinshe, halyqty kósheler men alańdarǵa shyǵýǵa úgittedi. Bul turǵyda olar onsyz da qıyn jaǵdaıdy ýshyqtyrdy. Biraq syn saǵatta olar úılerine baryp tyǵyldy», - dedi Qasym-Jomart Toqaev Almaty qalasy jurtshylyǵymen kezdesýinde.
Osy oraıda Prezıdent jappaı tártipsizdik kezinde myńdaǵan jaýapty azamattar qoǵamdyq jasaqtarǵa birigip, túrli nysandardy kúzetip, tonaýshylarǵa qarsy shyqqanyn atap ótti.
«Eriktiler áskerıler men polıtsııa qyzmetkerlerin ystyq tamaqpen qamtamasyz etti. Bul turǵyda olar maqtana bermeıtin, ózderine erekshe nazar aýdarýdy qajet etpeıtin naǵyz batyrlar. Al arandatýshylar ózderin tek batyr retinde kórsetkisi keledi», - dedi Memleket basshysy.
Prezıdent jaǵdaı qalpyna kele bastaǵanda ádildikti, otandastyrynyń amandyǵyn shynaıy oılaǵandaı bolǵan arandatýshylar qaıtadan alańdarǵa, kóshelerge tartyla bastaǵynyn atap ótti.
«Meniń oıymsha, bul naǵyz - ekijúzdilik ári arsyzdyq. Ókinishke qaraı, qazir de olar bul qaýipti oıyndy oınaýǵa tyrysyp otyr. Olar úshin bul jaı ǵana oıyn. Olar tek áleýmettik jelilerdegi aldamshy tanymaldylyǵy men jasyryn demeýshilerdiń nazaryn aýdarýdyń qamyn oılaıdy. Osy áreketterinen qarapaıym azamattar zardap shegip, memleket múddesine nuqsan keltiriledi», - dedi Qasym-Jomart Toqaev.
Memleket basshysy Qazaqstanda arandatýshy adamdardyń eshqandaı saıası bolashaǵy bolmaıtynyn aıtty.
«Qýatty ári damyǵan el qurý jolyndaǵy barlyq strategııalyq maqsattarymyzdyń oryndalatynyna qoǵamda úmit pen senim baryn kórip turmyn. Bul óz kezeginde óte mańyzdy. Biz birge barlyq syn-qaterdi eńserip, alǵa qoıylǵan mindetterdi sheshetinimizge senimdimin», - dedi Qasym-Jomart Toqaev.
