Toqaev Qańtar oqıǵasy týraly: UQK men ІІM keıbir basshylary syn saǵatta Otan aldyndaǵy adaldyǵyn saqtamady
ASTANA. KAZINFORM – Qańtar oqıǵasyn talqylaıtyndar kóbinese sol kezdegi daǵdarystyń túpki mánin túsinýge esh paıdasy joq dúnıelerdi qazbalap ketedi. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.
– Bul taqyrypqa qatysty negizgi mán-jaıdyń bári áldeqashan belgili boldy. Sol oqıǵalar boıynsha tergeý júrgizý kezinde quqyq qorǵaý organdary azamattyq qoǵam ókilderimen tyǵyz baılanysta jumys istedi. Birqatar qoǵamdyq komıssııa qurylyp, oǵan belgili zańgerler jetekshilik etti. Mundaı qadam jumystyń beıtarap ustanymmen júrgizilýine, sol arqyly barlyq oqıǵanyń aq-qarasyn anyqtaýǵa múmkindik berdi. Osy oraıda, azamattyq jaýapkershilik tanytyp, kásibı biliktiligin kórsetkeni úshin olarǵa rızashylyǵymdy bildirgim keledi, - dedi Prezıdent.
Memleket basshysy 2022 jyldyń naýryz aıynda Parlamentte arnaıy qoǵamdyq tyńdaý ótip, bul qańtar oqıǵasyna jáne elimizdiń konstıtýtsııalyq qurylymyn buzbaq bolǵan qylmyskerlerdiń áreketine egjeı-tegjeıli baǵa berilgenin aıtty.
- Iá, keıbir sot protsesteri, sondaı-aq, qańtarda urlanǵan kóptegen qarýdy izdestirý jumystary áli jalǵasyp jatyr. Sol kúnderi qylmyskerler úsh myńnan astam qarý-jaraqty ıemdenip ketken edi. Biraq kúshtik qurylymdardyń arqasynda qarý-jaraq jasyrylǵan qoımalardyń kóbi tabyldy. Qańtar oqıǵasyn talqylaıtyndar kóbinese sol kezdegi daǵdarystyń túpki mánin túsinýge esh paıdasy joq dúnıelerdi qazbalap ketedi. Sol úshin olardy kinálaýǵa da bolmas. Degenmen, aqıqat jolynda eshqashan qyzbalyqqa salynbaý kerek. Almatydaǵy alasapyran týraly jıi aıtylyp jatady, muny túsinýge de bolady. Biraq, zulymnyń sıqyrly taıaqshasymen jasalǵandaı adam sengisiz jaǵdaılar bolǵanyn da esten shyǵarmaý kerek. Naqtyraq aıtqanda, búlikti uıymdastyrýshylardyń ámirimen bir mezette on eki qalada jappaı tártipsizdik beleń aldy. Onyń arty qaskóılerdiń kóptegen oblys ákimdikteri men quqyq qorǵaý organdarynyń ǵımarattaryn basyp alýyna ákep soqtyrdy, - dedi Memleket basshysy.
Qasym-Jomart Toqaevtyń aıtýynsha «Tóńkeris» jasaýǵa ábden mashyqtanǵan mamandardyń jetekshiligimen tártipsizdikti uıymdastyrýshylar Úkimettiń janar-jaǵarmaı baǵasyn ósirý týraly sheshimin jeleý etip, adamdardy jappaı sherýge shyǵýǵa ıtermeledi.
- Sosyn azamattardyń, memlekettik qyzmetshilerdiń, bir tańǵalarlyǵy, kúshtik qurylym qyzmetkerleriniń edáýir bóliginiń arasynda dúrbeleń týǵyzdy. Olar qarý-jaraq pen qupııa qujattardy qaraýsyz qaldyryp, jumys oryndaryn tastap, kete bastady. Ulttyq qaýipsizdik komıtetiniń jáne Іshki ister mınıstrliginiń keıbir basshylary syn saǵatta Otan aldyndaǵy adaldyǵyn saqtap qala almady, kásibı deńgeıi de tómen ekenin kórsetti, - dedi Qasym-Jomart Toqaev.
Memleket basshysynyń aıtýynsha, osyndaı jaǵdaı, ásirese, búlikshilerdiń basty nysanasy bolǵan Almatyda anyq baıqaldy. Áskerı qyzmetshiler men qala turǵyndary qatty qorlyqqa ushyrady. Ákimshilik ǵımarattar, saýda ortalyqtary, dúkender men bankter qırap, órtke oranyp, tonalyp jatty.
- Mundaı júgensizdikke qarsy tótenshe sharalar qabyldaý qajet boldy. Qazir, arada biraz ýaqyt ótken soń, pıǵyly aram ári sana-sezimi taıaz keıbir adamdar memleketimizdiń eldi qurdymǵa jibere jazdaǵan sumdyq berekesizdikten aman qalǵany jaıly áńgimeni ádeıi aınalyp ótip, qasaqana oıyna kelgendi aıtyp júr, - dedi Prezıdent.
Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.