Toqaev Kanada parlamentshilerin qabyldady
ASTANA. QazAqparat - Senat Tóraǵasy Qasym-Jomart Toqaev Kanada Parlamenti Qaýymdar palatasy Syrtqy ister jáne halyqaralyq damý jónindegi komıtetiniń tóraǵasy Robert Nolt bastaǵan parlamenttik delegatsııany qabyldady. R.Nolt sondaı-aq «Qazaqstan-Kanada» parlamentaralyq yntymaqtastyq tobynyń teń tóraǵasy bolyp tabylady.
Q.Toqaev atap ótkendeı, Qazaqstan men Kanadanyń dıplomatııalyq qatynastar ornatqan 25 jyl boıy Prezıdent Nursultan Nazarbaev Kanadamen ózara tıimdi jan-jaqty yntymaqtastyqty damytýǵa, joǵary tehnologııalyq birlesken óndiristerdi qurýǵa, saýda-ınvestıtsııalyq baılanystardy óristetýge basa nazar aýdaryp keledi. Senat Tóraǵasy kanadalyq depýtattardy Astanada ótetin «EKSPO-2017» halyqaralyq kórmesine shaqyrdy.
Q.Toqaev EQYU Parlamenttik Assambleıasy aıasyndaǵy Qazaqstan men Kanada parlamentshileriniń syndarly yntymaqtastyǵyn atap ótti. Ol kanadalyq depýtattardyń Astanaǵa sapary ekijaqty parlamentaralyq dıalogke jańa serpin beretinine senim artatynyn jetkizdi.
Júzdesýshiler halyqaralyq saladaǵy mańyzdy máseleler, olardyń ishinde Sırııadaǵy jaǵdaı týraly pikir almasty. «Sırııa úkimeti men oppozıtsııasy ókilderiniń taıaýda Astanada ótetin kezdesýine (Astana protsesi) Qazaqstan zor úmitpen qaraıdy. Sırııa qaqtyǵystary taraptarynyń qantógisti toqtatýǵa, saıası tranformatsııalaný men eldi soǵystan keıingi qalpyna keltirý úderisterin bastaýǵa tamasha múmkindik bar. Álem qoǵamdastyǵy bul protseske jan-jaqty qoldaý kórsetýi tıis. Osyǵan baılanysty Qazaqstan Elordasy mańyzdy kelissózderdiń bastalýy úshin eń qolaıly oryn bolyp tabylady jáne bizdiń elimiz oǵan barlyq jaǵdaıdy jasaýǵa ázir», - dedi Q.Toqaev.
R.Nolttyń pikirinshe, Qazaqstan Kanadanyń «jaqyn dosy» bolyp tabylady, eki eldiń ortaq jaqtary kóp, onyń ishinde klımaty men geografııasynyń da uqsastyqtary bar. Kanada parlamentshileri Qazaqstanmen yntymaqtastyqty nyǵaıtýda nátıjeli ról atqarǵysy keledi. Depýtattar Qazaqstan táýelsizdiginiń 25 jylyndaǵy tamasha jetistikterin atap ótti. Parlamentshiler bizdiń elimizge aldaǵy eki jylda BUU Qaýipsizdik Keńesindegi turaqty emes múshesi laýazymynda jemisti jumys atqarýyna tilektestigin aıta otyryp, kúrdeli halyqaralyq máselelerdi sheshýge eleýli úles qosatynyna senim bildirdi.
Sol kúni Senat Tóraǵasy Germanııanyń Qazaqstandaǵy Elshisi Rolf Mafaeldi de qabyldady. Q.Toqaev dıplomatty bizdiń elimizdegi qyzmetiniń bastalýymen quttyqtady jáne Qazaqstan men Germanııanyń yntymaqtastyǵyn nyǵaıtýdaǵy mańyzdy jumysynda tabysty bolýǵa tilektestigin bildirdi.
