Toqaev Kambodjamen tikeleı áýe qatynasyn ashýdy pysyqtaýǵa shaqyrdy
ASTANA. KAZINFORM — Memleket basshysy Qasym-Jomart Toqaev pen Kambodja Premer-mınıstri Hýn Manet shaǵyn quramda kelissóz júrgizdi. Bul týraly Aqordanyń baspasóz qyzmeti habarlady.
Qazaqstan Prezıdenti mártebeli meımanǵa iltıpat bildirip, bul sapar ekijaqty qarym-qatynasqa tyń serpin beretinin jáne ózara tıimdi yntymaqtastyqty damytý perspektıvasyna jol ashatynyn aıtty.
– Saparyńyzdyń tarıhı máni zor dep sanaımyn. Óıtkeni buǵan deıin Kambodja premer-mınıstrleriniń Qazaqstanǵa joly túspegen. Al Sizdiń qazaq jerimen jeke baılanysyńyz bar. Ákeńiz 1982 jyly elimizge kelgen eken. Búgin ekijaqty qarym-qatynastyń aýqymdy máselelerin talqylaımyz. Qazaqstan halqynyń elińizge yqylasy erekshe. Kóptegen otandasymyz Kambodjaǵa baryp, onyń kórikti jerlerimen tanysqysy keledi. Elderimiz arasynda tikeleı áýe qatynasyn ashý máselesin pysyqtaýymyz qajet. Sondaı-aq gýmanıtarlyq saladaǵy baılanystardy jandandyrǵanymyz jón, – dedi Qasym-Jomart Toqaev.
Prezıdent Qazaqstan men Kambodja tabıǵı baılyǵy mol elder sanatynda ekenin jáne atalǵan saladaǵy yqpaldastyqty keńeıtýge bolatynyn aıtty.
Sonymen qatar kelissózder barysynda saýda-ekonomıkalyq baılanystardy nyǵaıtý máseleleri qarastyrylatynyn jetkizdi.
Kambodja Premer-mınıstri Qazaqstanǵa shaqyrǵany úshin Qasym-Jomart Toqaevqa alǵys aıtyp, eki el arasyndaǵy dıplomatııalyq baılanystar ornaǵanyna 30 jyldan asqanyn atap ótti.
– Búgin energetıka sektoryndaǵy yqpaldastyqty tereńdetý múmkindigi týyp otyr dep oılaımyn. Vedomstvolarymyzǵa ózara múddeli baǵyttardy anyqtaýdy tapsyra alamyz. Qazaqstan elektrondy úkimet boıynsha aıtarlyqtaı tabysqa qol jetkizdi ári ozyq ázirlemelerge ıe. Bizdiń mınıstrlikterimiz osy salada tájirıbe almasýǵa qyzyǵýshylyq tanytyp otyr, – dedi Hýn Manet.
Kezdesý barysynda taraptar saıası dıalogty, saýda-ekonomıkalyq baılanystar men kópjaqty alańdardaǵy yntymaqtastyqty odan ári keńeıtý jaıyn jan-jaqty talqylady.
Aıta ketelik Kambodja Premer-mınıstri Qazaqstanǵa resmı saparmen kelgen edi.
