Toqaev: Qalanyń shetkeri aýdandaryna kóńil bólmeý ádiletti qoǵam ıdeıasyna saı kelmeıdi

ASTANA. QazAqparat – Úılesimdi ári teńgerimdi megapolıs úshin tıimdi kólik júıesiniń bolýy asa mańyzdy. Bul týraly Astananyń baýyrlas qalalary forýmynda Prezıdent Qasym-Jomart Toqaev aıtty, dep habarlaıdy QazAqparat tilshisi.

«Ortalyq kóshelerdi ǵana jarqyratyp qoıyp, qalanyń shetkeri aýdandaryna kóńil bólmeý ádiletti qoǵam ıdeıasyna saı kelmeıdi. Úılesimdi ári teńgerimdi megapolıs úshin tıimdi kólik júıesiniń, sonyń ishinde damyǵan qoǵamdyq kóliktiń, yńǵaıly velosıped jáne jaıaý júrginshiler aýmaǵynyń bolýy asa mańyzdy», - dedi Qasym-Jomart Toqaev.

Prezıdenttiń aıtýynsha, tehnologııanyń, atap aıtqanda jasandy ıntellekttiń qaryshtap damýy qalalardy barynsha sapaly basqarý úshin jańa múmkindikterge jol ashady.

«Aqyldy qala» tujyrymdamasyn júzege asyrý azamattarǵa jańa tsıfrlyq qyzmet usynýǵa, ǵımarattardyń energııa tutyný tıimdiligin aıtarlyqtaı jetildirýge, sondaı-aq kólik aǵynyn túbegeıli ońtaılandyryp, kóshedegi qaýipsizdikti arttyrýǵa múmkindik beredi. Bul – biz úshin ózekti mindet. Sonymen qatar adamdarǵa ózara tyǵyz baılanys ornatýǵa kómektesip, azamattar men bıznestiń qaladaǵy ózekti problemalardy kóterip, olardy sheshe alatyn belsendi qoǵamdastyq qurý isine atsalysýyna yqpal etedi. Astana bul baǵytta damyp keledi jáne birqatar jetistikke jetti», - dedi Memleket basshysy.