Toqaev: Qaǵazbastylyq kózqarasynan qutyla almasaq, esh ilgerileý bolmaıdy
ASTANA. KAZINFORM — Konstıtýtsııa ár adamnyń qolynda júretin, jumys ústelinde turatyn qujat bolýǵa tıis. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Buǵan deıin elimizdiń ulttyq ıdeologııasyna qatysty kóptegen talqylaý bolǵanyn bilesizder. 1 shildede zańdy kúshine engen Konstıtýtsııamyz osy máseleniń núktesin birjola qoıdy dep aıtsaq, oryndy bolar. Konstıtýtsııada elimizdiń ótkeni, búgini jáne keleshektegi beınesi aıqyn kórinis tapty. Konstıtýtsııa preambýlasynda baıyrǵy qazaq jerinde memlekettiligimizdi nyǵaıtyp, Uly dalanyń myńdaǵan jyldyq tarıhynyń sabaqtastyǵyn saqtaýǵa basa mán beretinimiz naqty jazyldy. Bul — tól tarıhymyzǵa taǵzym etý, babalar amanatyna adal bolý degen sóz, — dedi Prezıdent.
Memleket basshysy sonymen qatar Negizgi zańda adam quqyqtary men bostandyǵyn qorǵaý, zań men tártipti ornyqtyrý, birlik pen yntymaqty saqtaý, halyqtyń ál-aýqatyn arttyrý, bilim men ǵylymdy, ınnovatsııany damytý memlekettiń myzǵymas mindeti retinde aıqyndalǵanyn aıtty.
— Birtutas ult retinde óskeleń urpaq aldyndaǵy asa joǵary jaýapkershilikti sezine otyryp, osy Konstıtýtsııany qabyldadyq. Sol arqyly bolashaǵy jarqyn, baǵdary aıqyn Ádiletti, Ozyq ári Kúshti Qazaqstannyń berik negizin qaladyq. Azamattarymyz Konstıtýtsııanyń erejelerin jaqsy bilip, kúndelikti ómirde qoldanǵan saıyn onyń kúshi de, qýaty da arta túsedi. Sol sebepti men Konstıtýtsııa ár adamnyń qolynda júretin, jumys ústelinde turatyn, jeke kitaphanasynan oryn alatyn qujat bolýǵa tıis dep esepteımin, — dedi Qasym-Jomart Toqaev.
Prezıdenttiń paıymynsha, Konstıtýtsııada bekitilgen qaǵıdattar men qundylyqtardy búkil el bolyp dáripteýimiz kerek.
— Biraq formalızm men naýqanshyldyqtan alshaq bolǵanymyz jón, áıtpese, osy asa mańyzdy jumysty qurtyp, halqymyzdyń aldynda uıatqa qalamyz. Baıaǵy jartas — sol jartas bolyp, qaǵazbastylyq kózqarasynan qutyla almasaq, esh ilgerileý bolmaıdy. Bul jumysty shyn júregimizben, aq nıetimizben atqarmasaq, qajetti nátıjege jetý óte qıyn bolady, — dedi Memleket basshysy.
Aıta keteıik, keshe Halyq Keńesiniń uıymdastyrýshylyq otyrysy ótti. Jıynda Memleket basshysy Qasym-Jomart Toqaev Qazaqstan Halyq Keńesi tóraǵasy qyzmetine Erlan Qoshanovtyń kandıdatýrasyn usyndy.
Usynys Keńes músheleri tarapynan qoldaý tapty.
