Toqaev Izraıl men Japonııa elshilerin qabyldady
ASTANA. QazAqparat - Senat Tóraǵasy Qasym-Jomart Toqaev Qazaqstandaǵy Izraıl elshisi Mıhael Brodskııdi onyń ótinishi boıynsha qabyldady.
Tóraǵa Izraıl Premer-mınıstri Bınıamın Netanıahýdyń jeltoqsanda Qazaqstanǵa josparlanǵan alǵashqy resmı saparynyń mańyzdy sıpatyn atap ótti. Q. Toqaevtyń pikirinshe, aldaǵy joǵary deńgeıdegi kelissózder ekijaqty yntymaqtastyqty múlde jańa deńgeıge kóteretin bolady. Senat basshysy parlamentaralyq baılanystardy odan ári nyǵaıtý jaıynda da aıtty.
Izraıl elshisi B. Netanıahý sapary aıasynda birqatar ekijaqty kelisimderge qol qoıýǵa ázirlik týraly habardar etti. M. Brodskıı sondaı-aq qazaqstandyq jáne ızraıldik buqaralyq aqparat quraldarynda jarııalanǵan Shımon Peres týraly estelik maqalasy úshin Senat Tóraǵasyna alǵys aıtty.
Sol kúni Q.Toqaev Japonııa Elshisi Itıro Kavabatomen de kezdesti. Júzdesýshiler Prezıdent Nursultan Nazarbaevtyń qarashanyń basyndaǵy Japonııaǵa resmı sapary zor tabyspen ótkenin atap ótti. Q. Toqaev Tokıodaǵy kelissózder ekijaqty yntymaqtastyq salasynda naqty nátıjelerge jetkizdi dep sanaıdy. Dıplomattyń aıtýynsha, Qazaqstan Prezıdentiniń Japonııa Parlamentindegi jarqyn da mazmundy sózin qos palatanyń depýtattary erekshe joǵary baǵalady.
Kezdesý barysynda jahyndyq qarýsyzdaný jáne ıadrolyq qarýdy taratpaý salasyndaǵy eki memleket yntymaqtastyǵynyń keleshegi talqylandy.
