Toqaev: Italııamen sırek jer metaldaryn ıgerý baǵytynda birge jumys isteýge daıynbyz

ASTANA. KAZINFORM — Memleket basshysy Qasym-Jomart Toqaev «Ortalyq Azııa — Italııa» birinshi sammıtinde Ortalyq Azııadaǵy sırek jer metaldarynyń ken oryndary týraly ózekti aqparattyń bárin bir jerge jınaqtaıtyn óńirlik zertteý ortalyǵyn qurý týraly bastamany eske saldy.

— Ónerkásip kooperatsııasyn nyǵaıtý úlken keleshekterge jol ashady. Bul tusta Qazaqstan sırek jer metaldarynyń qomaqty qoryna ıelik etip otyr jáne biz osy baǵytta Italııamen birge jumys isteýge daıynbyz, — dedi Memleket basshysy.

Prezıdent Qazaqstannyń osy salada mańyzdy bastamasy bar ekenin eske saldy.

 — Qazaqstan Ortalyq Azııadaǵy sırek jer metaldarynyń ken oryndary týraly barlyq ózekti aqparatty jınaqtaıtyn óńirlik zertteý ortalyǵyn qurý týraly bastama kóterdi. Biz ıtalııalyq kompanııalarǵa «Strategııalyq shıkizat ornyna — ınvestıtsııalar men tehnologııalar» formýlasyn basshylyqqa ala otyryp, sırek jer elementteri men mıneraldardy birlesken geologııalyq barlaý jáne óndirý úshin qolaıly jaǵdaılar usynýǵa daıynbyz, — dedi Qasym-Jomart Toqaev.

Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr. 

Sondaı-aq, búgin túske deıin Memleket basshysy Qasym-Jomart Toqaev pen Italııa Mınıstrler Keńesiniń tóraǵasy Djordja Melonı Astana halyqaralyq forýmynyń ekinshi kúnindegi plenarlyq sessııaǵa qatysty. 

Budan keıin Qazaqstan Prezıdenti men Italııa Premer-mınıstri Aqordadaǵy kelissóz qorytyndysy boıynsha Strategııalyq seriktestikti keńeıtý jóninde Birlesken málimdeme qabyldaǵan bolatyn.