Prezıdent Irandaǵy jaǵdaıǵa baılanysty qaýipsizdik máseleleri boıynsha tapsyrma berdi

ASTANA.KAZINFORM — Prezıdent Qasym-Jomart Toqaev Qaýipsizdik Keńesiniń Hatshysy Ǵızat Nurdáýletovke Taıaý Shyǵystaǵy ahýaldyń shıelenisýine baılanysty qaýipsizdik jóninde tapsyrma berdi. Bul týraly Prezıdenttiń keńesshisi – Baspasóz hatshysy Aıbek Smadııarov málim etti.

— Prezıdent Qasym-Jomart Toqaev Qaýipsizdik Keńesiniń Hatshysy Ǵızat Nurdáýletovke kúshtik qurylymdar men salalyq mınıstrlikterdiń jetekshilerimen birge Irandaǵy ahýaldyń ýshyǵýyna jáne elimizdegi turaqtylyqqa qater tóndirý yqtımaldyǵyna baılanysty shuǵyl sharalar josparyn ázirleýdi tapsyrdy, — delingen habarlamada.

Memleket basshysynyń tapsyrmasymen barlyq kúshtik qurylymdar táýliktik jumys kestesine kóshirilgeni aıtylǵan.

— Úkimette Syrtqy ister mınıstrligi jetekshilik jasaıtyn arnaıy monıtorıng toby jumysqa kiristi. Óńir ákimderine Taıaý Shyǵysta bolyp jatqan jaǵdaıdy eskere otyryp, sheshim qabyldaý tapsyryldy, — dep habarlady Aıbek Smadııarov.

Aıta keteıik, Izraıl búgin Tegeranǵa «preventıvtik soqqy» jasady. 

Taıaý Shyǵystaǵy jaǵdaıǵa baılanysty Almaty men Astanadan ushyp shyqqan ushaqtar keri oralatyny belgili boldy.

Iran Izraılge qarymta jaýap retinde birneshe zymyran jiberdi.

Al Qazaqstannyń SІM Irandaǵy Qazaqstan azamattarynyń arasynda zardap shekkender joq ekenin málimdedi.