Toqaev Iran kompanııalaryn iri jobalarǵa atsalysýǵa shaqyrdy
ASTANA. KAZINFORM – Qazaqstan-Túrikmenstan-Iran temir jolyn damytýdyń mán-mańyzy erekshe. Bul týraly Aqordada Iran Islam Respýblıkasynyń prezıdenti Masýd Pezeshkıanmen kelissózder qorytyndysyna oraı BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev aıtty.
– Investıtsııa – uzaq merzimge arnalǵan seriktestik kepili. Qazaqstanda 700-ge jýyq Iran kompanııasy bar. Bul kompanııalar negizinen ónerkásip, ınfraqurylym, aýyl sharýashylyǵy salalarynda jumys isteıdi. Qazaqstannyń iskerlik qaýymdastyǵy da Iran ekonomıkasyna ınvestıtsııa salyp jatyr. Kásipkerlerimiz taý-ken, kólik-logıstıka, azyq-túlik óndirisine qatysty túrli jobany júzege asyryp keledi. Biz senimdi seriktes retinde sheteldik ınvestorlardy qoldaýǵa, olarǵa qolaıly jaǵdaı jasaýǵa árqashan daıynbyz. Osy rette Iran kompanııalaryn uzaq merzimge arnalǵan iri jobalarǵa atsalysýǵa shaqyramyn, - dedi Prezıdent.
Memleket basshysynyń paıymynsha, kólik-logıstıka salasyndaǵy baılanysty kúsheıtýge mol múmkindik bar.
– Biz elderimizdiń strategııalyq turǵydan utymdy jerde ornalasqanyn tıimdi paıdalanýymyz kerek. Qazir Eýropa men Qytaı arasynda qurlyq arqyly tasymaldanatyn júktiń shamamen 85 paıyzy Qazaqstan arqyly ótedi. Osy rette Ońtústik-Soltústik dálizin jáne Qazaqstan-Túrikmenstan-Iran temir jolyn damytýdyń mán-mańyzy erekshe. Bul – eki eldiń múdesine saı keletin mańyzdy joba. Qazaqstan temir joldardy jańǵyrtý, kólik joldaryn salý, sondaı-aq Kaspıı teńizi arqyly ótetin keme qatynasyn jandandyrý jumysyn qolǵa aldy. Iran ınvestorlaryn osy bastamalarǵa atsalysýǵa shaqyrdyq. Qyzyǵýshylyq bildirgen jeke sektor ókilderine arnaıy usynystar daıyndap, qolaıly jaǵdaı jasaýǵa ázirmiz, - dedi Qasym-Jomart Toqaev.
Buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń prezıdenti Masýd Pezeshkıandy qarsy alǵanyn jazǵan edik.