Toqaev ınvestor tartýdaǵy júıesizdikti synǵa aldy
ASTANA. KAZINFORM — Investıtsııaǵa qatysty máselelermen «Báıterek» holdıngi belsendirek aınalysqany durys Bul týraly Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.
— Álemde ınvestıtsııaǵa talas kúsheıip keledi. Básekege qabiletti bolý úshin jedel sheshimder qabyldap, jyldam áreket etý qajet. Biraq elimizde ınvestor tartý jáne olardy jan-jaqty qoldaý júıesinde birizdilik joq. Árbir mekeme nemese jeke tulǵa oıynda ne bar bolsa, sony isteı beredi. Saldarynan keshendi kózqaras ta, úılesimdilik te, sabyrlyq ta, bilim de jetispeıdi, — dedi Prezıdent.
Sondyqtan Memleket basshysy ınvestıtsııa tartý isin bir ortalyqtan basqarýǵa múmkindik beretin tutas júıeni jetildire túsý kerektigin aıtty.
— Meniń oıymsha, baıaǵydan sórede jatqan máseleni, ıaǵnı ınvestıtsııalarmen júıeli túrde aınalysatyn mekemeni anyqtaý kerek. Sebebi qazirgi tańda osy baǵytta júıe joq. Birqatar memlekettik mekemege birdeı quzyretter berilgen. Qazirgi jaǵdaıda bul tásilder zaman talabyna saı kelmeıdi, ábden eskirgen. Bálkim, ınvestıtsııaǵa qatysty máselelermen «Báıterek» holdıngi belsendirek aınalysqany durys sheshim bolar. Al Ekonomıka mınıstrligi, Syrtqy ister mınıstrligi ınvestıtsııalarǵa baılanysty keıbir quzyretin oryndaýdy jalǵastyrady, — dedi Qasym-Jomart Toqaev.
Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.
