Toqaev: Halyqty, jastardy jumyspen qamtý – Úkimet úshin asa mańyzdy mindet

ASTANA. QazAqparat – Halyqty, jastardy jumyspen qamtý – Úkimet úshin asa mańyzdy mindet. Bul týraly elimizdiń áleýmettik-ekonomıkalyq damýy jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Qazir eńbek naryǵynda jastardyń úlesi artyp keledi. Úkimetke jáne ákimderge 2030 jylǵa qaraı 3 mıllıon 300 myń adamdy jumysqa turǵyzý týraly tapsyrma berildi. Onyń 2,2 mıllıony jastar bolýǵa tıis. Jańa jumys oryndary ýaqytsha emes, turaqty bolǵany jón. Elimizde aımaqtardyń jumyspen qamtý kartalary bekitilgen. Soǵan sáıkes jyl saıyn shamamen 950 myń adamǵa jumys taýyp berý kózdelgen. Ol úshin bıýdjetten 130 mıllıard teńge bólindi. Osy qarjynyń arqasynda, ıaǵnı sýbsıdııa arqyly 150 myń adam jumysqa ornalasady. Onyń bári – jastar jáne áleýmettik turǵydan osal sanattaǵy azamattar», - dedi Memleket basshysy.

Prezıdenttiń dereginshe, jastardyń kásipkerlik bastamasyna qoldaý kórsetý úshin 40 mıllıard teńge bólindi. Qarajat aımaqtarǵa berildi. Qazir bıznes salasyndaǵy úzdik ıdeıalardy tańdap alý úshin konkýrstar bastaldy.

«Halyqty, jastardy jumyspen qamtý – Úkimet úshin asa mańyzdy mindet. Ákimder bul jumystyń nátıjelerin turaqty túrde baıandap turýy kerek», - dedi Qasym-Jomart Toqaev.

Esterińizge sala ketsek, Úkimettiń keńeıtilgen keńesinde Premer-Mınıstrdiń orynbasary Altaı Kólginov bıyl 200 myń jastyń jumyspen qamtylatynyn aıtqan edi.