Prezıdent: Halyqaralyq sý uıymyn qurý bastamasy qoldaý tabady dep senemin
ASTANA. KAZINFORM — Qazaqstannyń Halyqaralyq sý uıymyn qurý bastamasy ShYU sammıtinde aıtyldy, dep habarlaıdy Aqordanyń baspasóz qyzmeti.
Shara barysynda sý qaýipsizdigi álemniń kún tártibindegi ózekti máseleniń biri retinde ataldy.
— Azyq-túlik, energetıka jáne áleýmettik salalardaǵy turaqtylyq, sondaı-aq ekonomıkalyq damý sýǵa tikeleı táýeldi. Degenmen sý resýrstaryn jahandyq basqarý júıesi áli tolyq qalyptaspaǵan. Sý problematıkasymen BUU-nyń ondaǵan qurylymy aınalysady. Alaıda keń ókilettikke ıe birtutas úkimetaralyq ámbebap uıym qurylǵan joq. Dál osy sebepti Qazaqstan BUU aıasynda Halyqaralyq sý uıymynyń negizin qalaýdy usyndy. Onyń mindeti — qoldanystaǵy tetikterdi qaıtalamaı, kerisinshe, ortaq isti úılestirý, úkimetter arasyndaǵy turaqty dıalogty qamtamasyz etý, resýrstardy jumyldyryp, ózara kelisimdi sheshimder ázirleý. ShYU Sý máselelerin taldaý ortalyǵy osy jahandyq bastamany óńirlik deńgeıde tolyqtyra alar edi. BUU aıasynda Halyqaralyq sý uıymy men ShYU Sý máselesin taldaý ortalyǵyn qurý týraly usynysyma múshe memleketter qoldaý kórsetedi dep senemin, — dedi Prezıdent.
Memleket basshysy sóz sońynda Shanhaı yntymaqtastyq uıymynyń Eýrazııa keńistigindegi elderdiń uzaqmerzimdi ári tabysty damýyn qamtamasyz etýge múmkindigi jetkilikti ekenin aıtty.
— Jalpyǵa ortaq ári birtutas qaýipsizdik, terezesi teń egemendik pen ózara qurmet qaǵıdattaryn halyqaralyq qatynastardyń ajyramas bólshegi retinde bekitý — ortaq jaýapkershiligimiz. Shanhaı uıymy qaýipsiz jáne ornyqty álemdik tártipti qurýǵa laıyqty úles qosatynyna senimdimin. Qazaqstan Uıym aıasyndaǵy barlyq seriktes memlekettermen dál osy baǵytta konstrýktıvti jumys atqarady, — dedi Qasym-Jomart Toqaev.
Budan buryn ShYU-ǵa múshe memleketter basshylary keńesiniń otyrysynda birqatar qujatqa qoıylǵanyn jazǵanbyz.
