Toqaev: Halyq Konstıtýtsııasyn Qýatty, Ozyq, Órkenıetti Qazaqstannyń jańa Jarǵysy deýge tolyq negiz bar
TÚRKІSTAN. KAZINFORM – Bul týraly Memleket basshysy Qasym-Jomart Toqaev Túrkistan oblysynyń jurtshylyǵymen kezdesýde aıtty.
— Jańa Konstıtýtsııa — Qasym hannyń qasqa joly, Esim hannyń eski joly, Áz Táýkeniń Jeti jarǵysynyń búgingi qubylmaly, shıelenister men soǵystarǵa toly jańa geosaıası jaǵdaıda kórinis tapqan jańa sıpattaǵy jalǵasy.
Sebebi biz bas qujatymyzdy qazirgi múlde jańa, tarıhı, geosaıası jaǵdaıda qabyldap otyrmyz. Sondyqtan bul — elimizdiń jasampaz rýhynyń kórinisi dep aıtý qajet, — dedi Qasym-Jomart Toqaev.
Prezıdnt Halyq Konstıtýtsııasyn Qýatty, Ozyq, Órkenıetti Qazaqstannyń jańa Jarǵysy deýge tolyq negiz bar ekenin tilge tıek etti.
— Halyq Konstıtýtsııasyn Qýatty, Ozyq, Órkenıetti Qazaqstannyń jańa Jarǵysy deýge tolyq negiz bar. Ata zańymyzdyń eń basty maqsaty — elimizdiń Táýelsizdigin, egemendigin, aýmaqtyq tutastyǵyn qorǵaý jáne azamattarymyzdyń quqyqtary men bostandyqtaryn saqtaý.
Sonymen qatar Konstıtýtsııaǵa sáıkes Zań men tártip qaǵıdatyn ornyqtyrý, adam kapıtalyn nyǵaıtý, ıaǵnı bilimdi, ǵylymdy, ınnovatsııany damytý, eńbekqorlyqty dáripteý, sondaı-aq tabıǵatty qorǵaý strategııalyq mańyzy bar mindet retinde aıqyndaldy.
El tarıhynda alǵash ret Konstıtýtsııada memlekettik Tý, Ánuran, jáne Eltańbamen qatar ulttyq valıýtamyz memleket nyshany retinde kórinis taýyp, bekitildi. Sonymen birge eriktilerdiń (volonterlerdiń) jankeshti qyzmeti de konstıtýtsııalyq sıpatqa ıe boldy, — dedi Prezıdent.
Aıta ketelik Memleket basshysy Túrkistan oblysyna jumys saparymen bardy.