Toqaev Gvıneıa-Bısaý jastaryna Qazaqstanda bilim alýdy usyndy

ASTANA. KAZINFORM — Ýmarý Embalo sapary Qazaqstan men Gvıneıa-Bısaý arasyndaǵy yntymaqtastyqqa tyń serpin beredi. 

Bul týraly elimizge resmı saparmen kelgen Gvıneıa-Bısaý Prezıdenti Ýmarý Sısoký Embalomen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.

— Azamattarymyz bir-birin jaqyn tanyp bilý úshin mádenı-gýmanıtarlyq baılanystyń mańyzy zor. Osy rette men Gvıneıa-Bısaý jastaryna Qazaqstannyń joǵary oqý oryndarynda bilim alýdy usyndym. Bul qadamdar eki el arasynda jan-jaqty yntymaqtastyqty jandandyrýǵa yqpal eteri sózsiz, — dedi Qasym-Jomart Toqaev.

Memleket basshysy mártebeli meımanmen halyqaralyq máseleler jóninde pikir almasyp, oı bóliskenin atap ótti.

— Qos memlekettiń kóptegen ózekti taqyryp boıynsha ustanymdary uqsas. Ásirese, jahandyq beıbitshilik pen óńirlik turaqtylyqty saqtaýǵa qatysty kózqarasymyz ortaq. Qazirgi geosaıası jaǵdaıda BUU men Afrıka odaǵy aıasynda ózara qoldaý kórsetý jáne konsýltatsııalar ótkizý asa mańyzdy. Jalpy, jan-jaqty qarym-qatynasty nyǵaıtýǵa mol múmkindik bar. Búgingi mańyzdy kelisimder sonyń aıqyn kórinisi. Ýmarý Embalo myrzanyń sapary Qazaqstan men Gvıneıa-Bısaý arasyndaǵy yntymaqtastyqqa tyń serpin beredi dep sanaımyz. Árdaıym ózara qoldaý kórsetip, tabysqa birge jetemiz dep senemin. Eki eldiń dostyǵy nyǵaıa bersin, — dedi Prezıdent.

Buǵan deıin Memleket basshysy Qasym-Jomart Toqaev Aqordada elimizge resmı saparmen kelgen Gvıneıa-Bısaý Prezıdenti Ýmarý Sısoký Embalony saltanatpen qarsy alǵanyn jazǵan edik.

Keńeıtilgen quramdaǵy kelissóz barysynda Qasym-Jomart Toqaev Qazaqstan Gvıneıa-Bısaýdy Afrıka qurlyǵyndaǵy mańyzdy seriktes retinde qarastyratyndyǵyn aıtty.

Kelissózder barysynda eki eldi basshylary Bısaý porty men Transkaspıı dálizin ushtastyrý joldaryn zerdeleýge kelisti.