Toqaev ǵımaratty 3D modeldeýmen jobalaıtyn kesheni bar Oraldaǵy kolledjge bardy
ORAL. QazAqparat - Qazaqstan Prezıdenti Qasym-Jomart Toqaev Oral aqparattyq tehnologııalar kolledjiniń oqytýshylarymen jáne stýdentterimen kezdesti, dep habarlaıdy QazAqparat Aqordaǵa silteme jasap.
Memleket basshysy tsıfrlandyrý baǵytynda bilim berýge basymdyq beretin kolledjdiń jobalarmen tanysty.
Elimizde alǵash ret ǵımarattardyń pishinin úsh ólshemdi 3D modeldeý ádisimen jobalaı alatyn keshen osy aqparattyq tehnologııalar kolledjinde iske asyrylǵan. Mamandar bul tehnologııamen jumys isteý úshin 3 aı Fınlıandııada oqyp qaıtty.
Sonymen qatar, Memleket basshysyna STEM bilim berý baǵdarlamasy tanystyryldy. STEM akademııalyq ǵylymı-tehnıkalyq tujyrymdamasy - naqty ómir úlgisinde oqytatyn ıntegratsııalanǵan oqytý ádisi.
- Qazirgi kezde sapaly bilim berý jáne qajetti mamandyqtar boıynsha oqytý asa mańyzdy. Kolledjderde bilim berýdiń jańa mazmunyn engizý jumystaryn alǵashqylardyń biri bolyp sizderdiń óńirlerińizdiń bastaǵany qýantty, - dedi Qasym-Jomart Toqaev.
Memleket basshysyna óńirde tsıfrlandyrý baǵdarlamasy aıasynda qolǵa alynǵan «Ashyq ákimdik», «SmartUralsk», «IkomekUralsk» jobalary tanystyryldy.
Kezdesýden keıin Qasym-Jomart Toqaev kolledj stýdentterimen áńgimelesip, bilim salasyn qoldaý isi jalǵasa beretinin atap ótti.
