Toqaev germanııalyq bıznesti Qazaqstan naryǵyna belsendirek qatysýǵa shaqyrdy
ASTANA. KAZINFORM — Memleket basshysy Germanııa Federaldyq ekonomıka jáne energetıka mınıstri Katerına Raıheni qabyldady, dep habarlaıdy Aqordanyń baspasóz qyzmeti.
Memleket basshysy Germanııa Federaldyq ekonomıka jáne energetıka mınıstri Katerına Raıheni qabyldady
Kezdesý barysynda Prezıdent Qazaqstannyń Germanııa Federatıvtik Respýblıkasymen strategııalyq seriktestikti damytýǵa aıryqsha mán beretinin atap ótti.
Qasym-Jomart Toqaevtyń aıtýynsha, Germanııa — elimizdiń eń iri saýda jáne ınvestıtsııalyq seriktesteriniń biri.
— Ekijaqty saýda jáne ınvestıtsııalyq yqpaldastyqta oń dınamıka baıqalady. 2005 jyldan beri Qazaqstan ekonomıkasyna 8 mıllıard dollardan astam tikeleı ınvestıtsııa tartyldy. Onyń basym bóligi shıkizattyq emes sektorǵa tıesili. Búginde elimizde nemis kapıtalynyń úlesi bar myńnan asa kompanııa tabysty jumys isteıdi. Olardyń arasynda CLAAS, Horsch, Siemens, BASF, Heidelberg Materials, Siemens Energy, Knauf jáne Linde sııaqty ónerkásip alpaýyttary bar, — dedi Memleket basshysy.
Prezıdent Qazaqstan tarapy germanııalyq bıznestiń bizdiń naryqqa kóbirek kelýi úshin qajetti jaǵdaı jasaýǵa daıyn ekenin rastady.
Qasym-Jomart Toqaev elimizde júrgizilip jatqan aýqymdy saıası ózgerister týraly áńgimeledi.
Jańa Konstıtýtsııada Qazaqstannyń demokratııalyq, zaıyrly, quqyqtyq jáne órkendegen memleket retinde damý baǵytyn aıqyndaıtyn negizgi qaǵıdattar kórinis tapqanyn aıtty.
Óz kezeginde Katerına Raıhe ekijaqty kún tártibiniń ózekti máselelerin talqylaý múmkindigi úshin Prezıdentke alǵys aıtyp, Qazaqstannyń áleýmettik-ekonomıkalyq damýyndaǵy eleýli tabystaryna toqtaldy.
Sondaı-aq mınıstr Qazaqstan Germanııanyń aımaqtaǵy iri saýda-ekonomıkalyq seriktesi sanalatynyn, ekijaqty yqpaldastyqty keńeıtýdiń áleýeti mol ekenin jetkizdi.
Kezdesýde energetıka, ónerkásip, tsıfrlandyrý, sırek kezdesetin metaldardy óndirý jáne óńdeý, kólik-logıstıka ınfraqurylymy salalaryndaǵy yntymaqtastyqty jandandyrý perspektıvasyna aıryqsha mán berildi.
Qasym-Jomart Toqaev Germanııanyń Federaldyq Prezıdenti Frank-Valter Shtaınmaıerge jáne Federaldyq kantsler Frıdrıh Mertske ystyq yqylasyn joldady.
Buǵan deıin Memleket basshysy Reseı Prezıdenti Vladımır Pýtınmen telefon arqyly sóıleskenin jazǵanbyz.
