Toqaev Germanııa Prezıdentin «Altyn Qyran» ordenimen marapattady
ASTANA. KAZINFORM – Qasym-Jomart Toqaev Germanııa Federatıvtik Respýblıkasynyń Prezıdentin «Altyn Qyran» ordenimen marapattady. Bul týraly Aqordanyń baspasóz qyzmeti habarlady.
Marapattaý saltanatynda Memleket basshysy Prezıdent Frank-Valter Shtaınmaıerdiń Qazaqstan men Germanııa arasyndaǵy yntymaqtastyqty nyǵaıtýǵa súbeli úles qosqanyn atap ótti.
— Sizdiń parasatty basshylyǵyńyz, berik ustanymyńyz jáne dıalog pen birlikke beıildigińiz zor qurmetke laıyq. Bul Germanııaǵa álemdegi seriktesteriniń senimin kúsheıtip, yqpaldastyqqa jol ashty. Búginde Germanııa — óndiriste, ǵylym men tehnologııada kósh bastaǵan, damýy qarqyndy ınnovatsııalyq elderdiń biri, — dedi Prezıdent.
Qasym-Jomart Toqaev ekijaqty qarym-qatynasty ilgeriletýdegi Frank-Valter Shtaınmaıerdiń róline toqtaldy.
— Prezıdent myrza, Sizdi Qazaqstannyń adal ári senimdi dosy, halyqaralyq deńgeıdegi kórnekti memleket qaıratkeri retinde joǵary baǵalaımyz. Qazaqstan men Germanııa arasyndaǵy dostyqty nyǵaıtýǵa, yntymaqtastyǵymyzdy jandandyrýǵa qosqan qomaqty úlesińizdi eskere otyryp, Sizge Qazaqstan Respýblıkasynyń eń joǵary memlekettik nagradasy — «Altyn Qyran» ordenin tabystaımyn. Bul marapatty qazaq halqynyń aıryqsha qurmeti men shynaıy rızashylyǵynyń belgisi retinde qabyl alyńyz, — dedi Memleket basshysy.
Frank-Valter Shtaınmaıer Ortalyq Azııaǵa udaıy nazar aýdaratynyn aıtty
— Men úshin Qazaqstan halqynyń orny erekshe. Elderimiz budan da bıik tabystarǵa jetedi dep oılaımyn. Qazaqstanǵa saparymdy yqylaspen eske alamyn. Eki eldiń myzǵymas dostyq baılanystary uzaq jylǵa ulasatynyna senimdimin, — dedi Germanııa Prezıdenti.
Aıta ketelik Qasym-Jomart Toqaev Germanııaǵa resmı saparmen barǵan edi. Qazaqstan men GFR prezıdentteri shaǵyn quramda kelissóz júrgizdi.
