Toqaev FIBA prezıdentimen kezdesti: Qazaqstan basketbolyn damytýǵa basymdyq beriledi
ASTANA. KAZINFORM — Táýelsizdik saraıynda Qasym-Jomart Toqaev Halyqaralyq basketbol federatsııasynyń prezıdenti Saýd Alı Ál-Tánımen kezdesý ótkizdi. Bul týraly Aqorda málim etti.
— Áńgimelesý barysynda Prezıdent FIBA-nyń otandyq basketbolǵa kórsetken qoldaýyn joǵary baǵalap, Saýd Alı Ál-Tánıge Qazaqstan Ulttyq basketbol federatsııasynyń otyrysyna qatysqany úshin rızashylyǵyn bildirdi. Memleket basshysy bıyl otandyq basketbol tarıhyna 100 jyl tolyp otyrǵanyn, osy oraıda, balalar men jastardyń yqylasy aýǵan basketbol tanymal sport túrleriniń qataryna engenin atap ótti, — delingen habarlamada.
Sonymen qatar Qazaqstannan halyqaralyq deńgeıde, sonyń ishinde álem chempıonattary men Olımpıada oıyndarynda óner kórsetken kórnekti basketbolshylar shyqqanyn aıtty.
Qasym-Jomart Toqaev elimizde keleshegi zor baǵyt retinde 3×3 formatyndaǵy basketbolǵa qyzyǵýshylyq arta bastaǵanyna toqtaldy.
Kezdesýde buqaralyq jáne kásipqoı basketboldy ilgeriletýge, sporttyq rezerv daıarlaýǵa, birlesken jobalardy iske asyrýǵa aıryqsha nazar aýdaryldy.
Federatsııa prezıdenti Memleket basshysyna elimizde atalǵan sport túrine qoldaý kórsetkeni úshin shynaıy rızashylyǵyn bildirip, Uıymnyń basketboldy odan ári dáripteýge baǵyttalǵan josparymen bólisti.
Aıta keteıik, buǵan deıin Pashınıan Toqaevty Quryltaı saılaýymen quttyqtady.
