Toqaev: Eýropalyq odaqtyń Transkaspıı kólik baǵytyn qoldaý múmkindigin qarastyrdyq

ASTANA. QazAqparat – Búgin Aqordada Eýropa sanktsııalarynyń Qazaqstan ekonomıkasyna yqpalyn boldyrmaý máselesi talqylandy. Bul týraly Eýropalyq keńestiń prezıdenti Sharl Mıshelmen kelissózderden keıingi baspasózge arnalǵan málimdeme barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Halyqaralyq kólik dálizderin damytýdyń mańyzdylyǵyn atap óttik. Bul qazirgi geosaıası jaǵdaıda óte ózekti máselelerdiń biri. Sondaı-aq Eýropalyq odaqtyń Transkaspıı halyqaralyq kólik baǵytyn qoldaý múmkindigin qarastyrdyq. Budan bólek, Eýropa sanktsııalarynyń Qazaqstan ekonomıkasyna yqpalyn boldyrmaý máselesin talqyladyq», - dedi Qasym-Jomart Toqaev.

QR Prezıdenti demokratııa, adam quqyqtary jáne zań ústemdigin saqtaý salasyndaǵy dıalogty odan ary kúsheıtý máselelerine de toqtalǵandaryn atap ótti.

«Prezıdent Sharl Mıshel memleketimizdiń jańa damý kezeńi – Ádiletti Qazaqstan qurý jolynda júzege asyrylyp jatqan aýqymdy reformalarymyzdy qoldaıtynyn jetkizdi. Men de Eýropalyq taraptyń túrli baǵdarlamalar aıasynda elimizge kórsetip otyrǵan qoldaýy úshin alǵysymdy bildirdim», - dedi Memleket basshysy.