Toqaev Eýropalyq komıssııa prezıdenti Ýrsýla fon der Lıaıenmen kezdesti
TAShKENT. KAZINFORM – «Ortalyq Azııa – Eýropa Odaǵy» sammıti aıasynda Qasym-Jomart Toqaev pen Eýropalyq komıssııa Prezıdenti Ýrsýla fon der Lıaıen kezdesý ótkizdi. Bul týraly Aqordanyń baspasóz qyzmeti habarlady.

Áńgimelesý barysynda Qazaqstan men Eýropa Odaǵynyń ekonomıkanyń túrli sektoryndaǵy, tsıfrlandyrý jáne ınnovatsııa salalaryndaǵy yntymaqtastyǵyn damytý perspektıvasy talqylandy. Taraptar Qazaqstan men Eýropalyq komıssııa arasynda vıza berý tártibin jeńildetý jónindegi kelisimge kelý úderisi bastalǵanyn oń baǵalady.
Qasym-Jomart Toqaev Keńeıtilgen seriktestik jáne yntymaqtastyq jónindegi kelisim Qazaqstan men Eýropa Odaǵynyń san qyrly yqpaldastyǵyna negiz bolyp otyrǵanyn jetkizdi.

Memleket basshysy Qazaqstannyń Eýropamen yntymaqtastyǵyn odan ári tereńdetetin tórt basym baǵytty atady. Bul – energetıka, iri ınfraqurylym jáne ónerkásip jobalaryn júzege asyrý, kólik-logıstıka jelilerin keńeıtý, sondaı-aq tsıfrlyq ınnovatsııa, ozyq tehnologııalar men jasandy ıntellekt baǵytyndaǵy seriktestik.
Ýrsýla fon der Lıaıen kólik-logıstıka salasyndaǵy, sonyń ishinde Transkaspıı halyqaralyq kólik dálizi sekildi jobalardy iske asyrýdyń mańyzyna toqtaldy. Ol Qasym-Jomart Toqaevty Qazaqstanda sırek kezdesetin metaldardyń iri ken ornynyń tabylýymen quttyqtady.
Taraptar S5+EO aıasyndaǵy jumysty jalǵastyrýǵa ýaǵdalasty. Sonymen qatar óńirlik jáne halyqaralyq kún tártibindegi ózekti máseleler jóninde pikir almasty.