Toqaev Eýropalyq Keńes Prezıdentin І dárejeli «Dostyq» ordenimen marapattady
ASTANA. KAZINFORM — Saltanatty rásimde Qasym-Jomart Toqaev Antonıý Koshtanyń Qazaqstan men Eýropa Odaǵy arasyndaǵy seriktestikti nyǵaıtýǵa qomaqty úles qosqanyn atap ótti, dep habarlaıdy Aqordanyń baspasóz qyzmeti.
Memleket basshysy ekijaqty yntymaqtastyqtyń aýqymy jyldan jylǵa keńeıip kele jatqanyn alǵa tartty.
— Bul qos tarapqa da paıdasyn tıgize otyryp, yqpaldastyqty odan ári tereńdetýge jol ashty. Bıyl Keńeıtilgen seriktestik jáne yntymaqtastyq týraly kelisimniń qabyldanǵanyna 10 jyl toldy. Qazaqstan men Eýropa Odaǵy arasyndaǵy qarym-qatynastyń ózegine aınalǵan bul mańyzdy qujat syndarly ári bolashaqqa baǵdarlanǵan baılanysty bekite túsedi. Prezıdent Koshta myrza, ózara tıimdi yntymaqtastyqty ilgeriletýge belsene atsalystyńyz. Siz — Qazaqstannyń senimdi dosy jáne álemdik deńgeıdegi kórnekti memleket qaıratkerisiz. Sizdiń parasatty basshylyǵyńyz ben berik ustanymyńyz, syndarly dıalog júrgizýge nıet tanytýyńyz Eýropadaǵy birlikti nyǵaıtýda jáne álemdegi barsha seriktestermen mazmundy yntymaqtastyqty damytýda mańyzdy faktorǵa aınaldy, — dedi Memleket basshysy.
Prezıdent Qazaqstan men Eýropa Odaǵy arasyndaǵy seriktestikti tereńdetýge Antonıý Koshtanyń qosqan úlesin joǵary baǵalady.
— Qurmetti Prezıdent myrza, Sizge І dárejeli «Dostyq» ordenin tabystaý men úshin zor mártebe. Bul joǵary nagradany Qazaqstan men Eýropa Odaǵy arasyndaǵy berik dostyqtyń jarqyn belgisi, Sizge kórsetilgen qurmetimiz retinde qabyl alasyz dep úmittenemin. Qazaqstan men EO arasyndaǵy tabysty seriktestiktiń odan ári damyp, dostyǵymyzdyń bekı beretinine senimdimin, — dedi Qasym-Jomart Toqaev.
Óz kezeginde Eýropalyq Keńes Prezıdenti bul marapatty Qazaqstan men Eýropa Odaǵy arasyndaǵy berik dostyq pen san qyrly yntymaqtastyqtyń sımvoly retinde qabyldaıtynyn jetkizdi.
— Búgin kórsetken qurmetińizge dán rızamyn. Muny senim men dıalogty nyǵaıtýdyń, turaqtylyqty, órkendeýdi jáne ashyqtyqty qamtamasyz etýge ortaq umtylysymyzdyń kórinisi dep baǵalaımyn. Qurmetti Prezıdent myrza, halyqtarymyz ben tutas aımaqtyń ıgiligi úshin birlesken jumysty aldaǵy ýaqytta da belsendi túrde jalǵastyramyz dep oılaımyn, — dedi Antonıý Koshta.
Budan buryn Qasym-Jomart Toqaev Aqordada elimizge alǵash ret resmı saparmen kelgen Antonıý Koshtamen kezdesý ótkizgenin jazdyq.