Toqaev Euronews arnasynyń elimizde ashylýyn óte mańyzdy oqıǵa dep baǵalady
ASTANA. KAZINFORM – Memleket basshysy Euronews dırektorlar keńesiniń tóraǵasy Pedro Vargas Davıdti qabyldady, dep habarlaıdy Aqordanyń baspasóz qyzmeti.
Kezdesýde Qazaqstan men Euronews telearnasy arasyndaǵy yntymaqtastyq máseleleri talqylandy. Bul — kóptegen tilde habar taratatyn álemdegi kóshbasshy BAQ-tyń biri.
Qasym-Jomart Toqaev Euronews arnasynyń elimizde aımaqtyq haby ashylýyn óte mańyzdy oqıǵa dep baǵalady. Osy arqyly dúnıe júziniń túkpir-túkpirindegi kórermen Qazaqstannyń ǵana emes, Ortalyq Azııanyń ekonomıkalyq, mádenı jáne týrıstik áleýetimen jaqyn tanysýǵa múmkindik alady.
Prezıdent atalǵan medıa alańy aımaqtaǵy elder men Eýropa Odaǵy arasyndaǵy dıalog pen ózara túsinistikti ilgeriletýge septigin tıgizetinine nazar aýdardy.
Pedro Vargas Davıd Euronews Academy jobasynyń josparymen tanystyrdy. Atalǵan bastama Qazaqstan jýrnalısteriniń zamanaýı tehnologııalardy meńgerýi men joǵary kásibı standarttardy ıgerýine baǵyttalǵan. Bul otandyq medıanyń básekege qabilettiligin arttyrýǵa yqpal etedi.
Memleket basshysynyń aıtýynsha, elimiz jahandaný jaǵdaıyndaǵy aqparattyq ortada tıimdi jumys isteı alatyn bilikti mamandar daıarlaýǵa qyzyǵýshylyq tanytyp otyr.
Pedro Vargas Davıd Prezıdent Qasym-Jomart Toqaevtyń basshylyǵymen Qazaqstannyń ornyqty damýyn qamtamasyz etý jáne qoǵamnyń ashyqtyǵyn arttyrý maqsatynda júrgizilip jatqan reformalardyń mańyzyna toqtaldy.
Budan bólek, áńgimelesý barysynda álemdegi geosaıası ahýalǵa qatysty ózekti máseleler talqylandy.