Toqaev Eýrazııanyń zamanaýı kólik-logıstıkalyq qańqasyn qurý isin jedeldetýdi usyndy

Onyń pikirinshe, memleketterdiń geografııalyq baılanysy Shanhaı yntymaqtastyq uıymynyń strategııalyq artyqshylyǵy sanalady.

— Qazaqstan «Bir beldeý, bir jol» megajobasyn Transkaspıı halyqaralyq kólik baǵdarymen, Soltústik — Ońtústik dálizimen, sondaı-aq Ortalyq jáne Ońtústik Azııanyń perspektıvti saýda joldarymen ushtastyrýǵa basa mán beredi. Elimiz kólik salasyndaǵy bastamalardy Shanhaı yntymaqtastyq uıymy aýmaǵynda ilgeriletýge ázir. Ol úshin keden rásimderin tsıfrlandyryp, elektrondyq qujattardy ózara taný, «jasyl dáliz» qaǵıdatyn jáne basqa da zamanaýı tetikterdi qoldanǵan jón. Bul rette ShYU Biryńǵaı tranzıt tsıfrlyq platformasyn qurý tıimdi tásil bolar edi. Ol úılesimdi tsıfrlyq sheshimder negizinde júktiń jóneltý pýnktinen sońǵy núktedegi alýshyǵa deıin kedergisiz ótýine múmkindik beredi. Quqyqtyq-normatıvtik bazany nyǵaıtý úshin Shanhaı yntymaqtastyq uıymynyń 2035 jylǵa deıingi Kólik baılanysy strategııasyn ázirlep, qabyldaýdy usynamyz, — dedi Prezıdent.

Taǵy bir basym baǵyt retinde jańa tehnologııalyq júıe qalyptastyrý aıtyldy. Prezıdent jasandy ıntellekti men tsıfrlyq tehnologııalardyń qaryshtap damýy ShYU elderinen ózgeristerge beıimdelýdi ǵana emes, ozyq sheshimderdi de talap etedi dep sanaıdy.

— ShYU-ǵa múshe memleketterdiń ǵylymı, ınnovatsııalyq áleýeti mol. Sondyqtan tájirıbe almasýmen ǵana shektelmeı, jasandy ıntellekt ekojúıesin dáıekti túrde qalyptastyra otyryp, tehnologııalardy birlese oılap tabýdy jáne quzyrettilikti arttyrýdy jedeldetýge bolar edi. Qazaqstan osy saladaǵy halyqaralyq yntymaqtastyqty keńeıtýdi qalaıdy. Bıyl elimiz Qytaıdyń bastamasymen qurylǵan Dúnıejúzilik jasandy ıntellekt salasyndaǵy yntymaqtastyq uıymynyń (WAICO) negizin qalaýshylardyń biri boldy. Sondyqtan Uıymǵa múshe elderdiń jetekshi ýnıversıtetteriniń, ǵylymı mekemeleriniń jáne tehnologııalyq kompanııalarynyń qatysýymen ShYU aıasynda Jasandy ıntellekt ortalyqtarynyń jelisin qurýdy usynamyz, — dedi Memleket basshysy.

Prezıdent Shanhaı yntymaqtastyq uıymyn reformalaý máselesi áli de ózekti ekenine nazar aýdaryp, bul jumysty syrtqy saıasat vedomstvolaryna júkteýdi usyndy.

— Sóz sońynda Qazaqstan ShYU aıasyndaǵy san qyrly yntymaqtastyqty jańa ári sapaly deńgeıge kóterýge barynsha kúsh salýǵa daıyn ekenin taǵy da rastaımyn. Ózara senim men yqpaldastyqtyń arqasynda biz budan da bıik belesterdi baǵyndyratynymyzǵa kámil senemin. Elimiz osy joldy birge eńserýge ázir, — dedi Qasym-Jomart Toqaev.

Jıynda Qyrǵyzstan Prezıdenti Sadyr Japarov, Belarýs Prezıdenti Aleksandr Lýkashenko, Úndistan Premer-mınıstri Narendra Modı, Iran Prezıdenti Masýd Pezeshkıan, QHR Tóraǵasy Sı Tszınpın, Pákistan Premer-mınıstri Shahbaz Sharıf, Reseı Prezıdenti Vladımır Pýtın, Tájikstan Prezıdenti Emomalı Rahmon jáne Ózbekstan Prezıdenti Shavkat Mırzıeev sóz sóıledi.

Eske salaıyq, buǵan deıin Prezıdent Qyrǵyzstan Shanhaı yntymaqtastyq uıymyna tabysty tóraǵalyq etkenin aıryqsha atap ótkenin habarlaǵan edik.