Toqaev: Eskiliktiń shyrmaýynda qalý — nadandyq pen qarańǵylyqqa aparatyn jol
ASTANA. KAZINFORM — Tarıhty zertteý degenimiz ótkenmen ómir súrý nemese kóneni kókseý emes. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Biz álemdegi mańyzdy geosaıası jáne órkenıet ortalyǵy retinde óz tarıhı mıssııamyzdy qaıta jańǵyrta bastadyq. Bul úderiske halyqtarymyzdyń, sonyń ishinde óskeleń urpaqtyń teńdessiz rýhy men kúsh-qýaty sheshýshi ról atqarady. Sonyń arqasynda qazir biz aldymyzǵa bıik maqsattar qoıyp, mańyzdy mindetterdi oryndap kelemiz. Sondyqtan ata-babadan qalǵan mol murany qazirgi zamannyń qundylyqtarymen jáne ozyq tehnologııamen ushtastyrý mańyzdy. Tarıhty zertteý degenimiz ótkenmen ómir súrý nemese kóneni kókseý emes. Eskiliktiń shyrmaýynda qalý — nadandyq pen qarańǵylyqqa aparatyn jol. Túptamyrymyzdy tolyqqandy tanyp-bilý arqyly ult damýynyń kókjıegin keńeıte túsý qajet. Biz osy qaǵıdany tereń túsine otyryp, jańa Ata zańda mádenı muralarymyzdy saqtaýǵa, bilim men ǵylymdy, ınnovatsııany damytýǵa aıryqsha basymdyq berdik. Bul mańyzdy jumysty bastap ta kettik, — dedi Prezıdent.
Qasym-Jomart Toqaev apta buryn jasandy ıntellektini orta bilim berý júıesine engizý týraly arnaıy Jarlyqqa qol qoıǵanyn eske saldy.
— Barshańyzǵa belgili, qazirgi zamanaýı tehnologııa ómirdiń barlyq salasyna túbegeıli enip, aýqymdy ózgeristerge jol ashyp jatyr. Bul úrdis adamzat bolashaǵyna tikeleı yqpal eteri anyq. Bir sózben ozyq tehnologııa kún saıyn asa joǵary qarqynmen damyp jatyr. Bul — 21 ǵasyrdyń aqıqaty. Biz muny jaqsy túsinemiz. Sondyqtan zaman talabyna tez beıimdele alatyn zerdeli urpaq tárbıeleýge basa mán berip otyrmyz. Bul baǵytta kóptegen bastamany qolǵa alyp jatyrmyz, — dedi Memleket basshysy.
Prezıdent Altyn Orda sol kezeńdegi kóptegen memleketterge qaraǵanda óz damýynda strategııalyq ashyqtyq qaǵıdatyna berik bolǵanyna nazar aýdartty.
